«Зарница» – те Васенцетнень Движениянь флагманской проект, конась вейсэнди ютазь шкань (спортонь военно-прикладной видтнэнь) ды неень шкань (цифровой технологиятнень ды одкстомтозь снаряжениятнень) сюпавчинть. Республикасонть налксемань кочкамонь пелькстнэсэ ульнесть 15 тежадо седе ламо ломанть. Весе енкстнэсэ ютасть муниципальной пелькст. Сехте вадрятнень ютксто сехте вадрятне кармасть региононь пельксэнь участникекс, сынь бороцить праванть кисэ ванстомс республикань честенть округонь пелькссэнть.
Кочкуровань енкссо площадкантень пурнавсть 15 сехте виев командатне. Сынст наставниктнень ютксо - специальной военной операциянь боецтнэ ды ветерантнэ, виень структуратнень представительтне.
«Тынь топавтадо сехте эрявикс тев минек масторонть туртов, – пшкадсь «Зарницань» участниктненень Артём Здунов. - 15 командат – те пек ламо. Невтинк эсь ерокчинк ды сехте вадря енксонк. Саеде опыт минек боецтнэнь пельде».
Паронь арсемань вал марто эйкакштненень истя жо пшкадсь Мордовия Республикава Россиянь Федерациянь Национальной гвардиянь войскатнень федеральной службань управлениянь прявтось Андрей Каринкин. «Зарницась» – те мужествань школа, конасонть кемекставить Отечествань ванстыцянтень эрявикс енкстнэ. Кадык изни сехте виевесь!» – мерсь сон.
«Зарницантень» совавтозь ламо варчамот, сынст ютксо - военизированной эстафета, общевойсковой содамочить, строевой анокстамо, Россиянь государственностень ды военной историянь юрт, тактической медицина, огневой анокстамо, радиационной, химической ды биологической ванстома, цидярдома экстремальной условиятнесэ, инженерэнь оборудования ды таркатнень кекшема, тактической анокстамо. Налксемань участниктне варчить пряст отрядтнэнь командирэкс, БПЛА-нь операторокс, штурмовикекс, политрукокс, военкорокс, инженерэкс-сапёрокс ды медикекс.
«Мон пек кенярдан истят налксематнес понгоманть кувалма, – евтнесь Саранск ошонь 24№ школасто кеменце классо тонавтницясь Вероника Дуденкова. – Минек отрядсонть мон медик. Сы шкасто арсян кармамс врачокс. Кеман, тесэ пурназь ерокчитне монень пек лездыть».
Республикань Прявтось ваннынзе варчамотнень туртов площадкатнень, кортась эйкакштнень ды наставниктнень марто. «Весемесь алкуксокс», – тешкстызе сон.
Тесэ жо ютавтовсь Мордовия Республикава Васенцетнень Движениянть марто вейсэнь тевдеемань коряс координационной советэнь выездной промксось.
Артём Здунов тешкстызе: эряви кирдемс эйкакштнень ушодксост, лездамс, вейсэ важодемс. Ушодкстнэнь кирдеманть туртов вадря инструментэкс ашти Васенцетнень Движениянь грантонь пелькстамось. Мордовиясь тесэ – васенцетнень ютксо каязь яволявтоматнень коряс, совась топ-10 регионтнэнь юткс. Кирдезь 12 яволявтомат 16 млн целковойтнес.
Промкссонть кортасть од ломантнень военно-патриотической воспитаниянь коряс важодемадонть, мельстуиця проекттнэнь топавтомань коряс арсематнеде. Сынсь школасо тонавтницятне евтнесть, мезенть лангс бу сынь явовольть мель, конат енкстнэнень эряви экспертэнь ды финансонь лезкс. Республикань Прявтось алтась лездамс снаряжениянь ды оборудованиянь рамамосо, конась эряви тонавтоманть туртов. Промкссонть истя жо кортасть СВО-нь участниктне ды ветерантнэ. Евтазель мель теемс «Зарница» налксемань координационной штаб – те лезды седе куроксто ды вадрясто анокстамс эйкакштнень пелькстамотнес.
Мордовия Республикань Прявтонь Пресс-службась