Дмитрий Поздняков важодемань содавтома марто ульнесь Лямбирень енкссо

Дмитрий Поздняков важодемань содавтома марто ульнесь Лямбирень енкссо

Даволковонь 3-це чистэ Мордовиянь Правительствань Председателесь Дмитрий Поздняков важодемань содавтома марто ульнесь Лямбирень енкссо.

Покш Елховка велесэ премьер-министрась ваннынзе школань педе-пев витнемань коряс тевтнень. Витнемс ды од оборудованиянь рамамс явовить 88 миллиондо ламо целковойть. Весе тевтнень арсеви прядомс тонавтнемань од иенть ушодовомс. Дмитрий Поздняков кармавтсь эрязкавтомс витнемань тевтнень ды максомс объектэнть медьковонь 1-це чинтень.

Покш Елховкасо «Комплексное развитие сельских территорий» госпрограмманть лувсо ютавтови велень культурань кудонь педе-пев витнемась. Тевтне, конатнес явовить 77 миллионт целковойть, прядовить те иестэнть. Премьер-министрась тешкстызе гончарной мастерскоень тевдеемань виевгавтомань эрявиксчинть, сон важоди культурань кудонть пингстэ.

Правительствань Председателесь истя жо якась «Октябрьская» агрофирмантень. Предприятиясонть топавтови инвестициянь проект ветеце очередэнь комплексэнть строямга, ков кельгстявить 750 тежат нармунть, проектэнть питнезэ 950 миллионт целковойть.

Теке чистэнть Дмитрий Поздняков ульнесь Лямбирень енксонь Депутаттнэнь советэнь сессиясонть. Муниципалитетэнь прявтось Юрий Голов пачтясь ютазь иестэ важодемань прявт невтевкстнэде. Районось иестэ иес невти социальной ды производствань енкстнэсэ вадря динамика.

Лямбирень енкссонть эрязасто топавтовить нацпроекттнэ ды госпрограмматне: 2022 иестэ Лямбирьсэ строязь ведень саемань сюлмо ды ведень ванськавтомань станция, педе-пев витнезь Лямбирень 1№ школась, райцентрань вете куротнесэ строязь газопровод. Муниципалитетсэнть эрязасто топавтови социальной газификациянь программась.

Региононь Правительствань Председателесь евтась сюкпря муниципалитетэнь прявтонтень, райононь активентень, Депутаттнэнь советэнтень, предпринимательтненень 2022 иестэ вейсэнь важодеманть кисэ. Истя жо Весероссиянь велень XII Сабантуень анокстамонть ды ютавтоманть кисэ.

Премьер-министрась башка тешкстызе Лямбирень енксонь прявтонть ды эрицятнень тевдеемаст специальной военной операциянь участниктненень ды сынст семиятненень лездамонть коряс. Дмитрий Поздняков макссь вадря питне муниципалитетэнь важодемантень эсь доходтнэнь кастоманть, недвижимой ули-паронь объекттнэнь инвентаризациянь кастоманть коряс.

Те иентень прявт тевтнень ютксо Правительствань Председателесь тешкстызе китнень инфраструктурань виевгавтоманть, Атемарсо ведень саемань сюлмонь ды ведень ванськавтомань станциянь строямонь эрявиксчинть.

Лямбирень енкссо арсеви строямс шукшонь явшемань комплекс. Проектэнь топавтомась лезды вадрялгавтомс экологиянь тевтнень.

«Весе тевтнень, конатнень эряви топавтомс минек регионсо, Мордовиянь Прявтось Артём Здунов путынзе Государственной Собраниянтень Кучомасонть. Кемекстазь республикань Прявтонь Кучомань топавтомань коряс тевтнень аравтлувось. Сынь истя жо аравтозь кадрань потенциалонь кастомантень, специалисттнэнь тердемантень, неть кевкстематне эрявить Лямбирень енксонтеньгак», – тешкстызе премьер-министрась.