Тешкстазель, вейсэнь тевдеемадо ниле енксонь вейсладямонть лувсо тесэ ладязь важодемань кеме сюлмот Дубенкань ексонь администрациянть ды ветеранонь советэнть, Россиянь Социальной фондонь региононь отделениянть ды республикасонть «Союз пенсионеров России» отделениянть ютксо.
Эрьва чистэ куншкакуросонть ютавтовить мероприятият – ковозонзо эйстэст 50 седе ламо. Весе сынст питневтеме ютавтыть тердезь лектортнэ, Пенсионертнэнь вейсэндявксонь тесэнь отделениянтень совицятне, Социальной фондонь отделениянь сотрудниктне, Куншкакуронтень сынсь яксицятне.
Учреждениясонть теезь шкинемань мастерской, «Компьютерный мир», «Тихая гостиная», «Буфет здорового питания», «Территория гармонии» таркатне, важодить медицинань нупаль, актовой ды спортивной залт.
Эйзюрковонь 22-це чистэнть Сыре ломантнень вастовомань-кортамонь куншкакуронтень сакшнось Мордовиянь Прявтось Артём Здунов. Сон ваннызе куншкакуронть, кортась сонзэ важодицятнень ды тов яксицятнень марто.
Шкинемань мастерскойсэнть кедьчелькев аватне пурныть алмазонь мозаика, викшнить бисерстэ картинат. Свалшкане ютавтыть важодевкстнэнь выставкат. Куншкакуронтень яксицятне явить лезкс СВО-нь участниктненень – кодыть кекшемань алтымат, носкат, пурныть ды кучить боецтнэнень-земляктненень ярсамопель марто посылкат. Ансяк те телестэнть «Тепло солдату» акциянть лувсо кодасть носкатнень 80 седе ламо парат.
Актовой залсонть ютавтовить «Сударушка» ансамблянь репетициятне, лекциятне ды мероприятиятне. Дубенкань сыре ломантне башка мель явить физической культурантень, кирдевить евтавксонтень: «Якамось – те эрямо».
Тей понгомсто сеске редяви, Куншкакуросонть пенсионертнэ аволь сакшныцят, сынь тесэ прявтт. Сиянь иень ломантненень ютавтовить экскурсият «Социальный туризм» программанть коряс, психолог марто релаксациянь сеанст, библиотекасо налксить шахматасо ды шашкасо, кортыть ловнозь произведениятнень коряс ды евтнить шкинемань муевкстнэде.
Тестэнь поэтессась Светлана Фадейкина ловнынзе Артём Здуновнень эсь стихензэ. Мордовиянь Прявтось евтась мель Светлананень нолдамс тевс эсь шкинеманть, примамс участия художественной фильматнень теемасо, конатне ней снимавить Мордовиясо.
Тешкстазель, поколениятнень ютксо сюлмотнень кирдеманть туртов пенсионертнэ ютавтыть патриотической воспитаниянь урокт школасо тонавтницятнень марто. Прявт енксось – пенсионертнэнь компьютерэнь ды финансонь содамочист кастомась. Спикертнэнь ютксо правань ванстомань органтнэнь сотрудниктне, банконь сферань ды Саранскоень Наукань ды техникань кудонь важодицятне.
Артём Здунов тешкстызе, те Куншкакурось – сыре ломантнень оймсемаст ютавтомань, мелень явомань лувонь теемань, эсь прянь невтемань туртов башка возможносттнень теемань коряс социальной миссиянь пек вадря невтевкс.
Мордовия Республикань Прявтонь Пресс-службась