«Монь, васняяк, талновтыть ярсамопелень товартнэнь ды стройматериалтнэнь лангс питнетне. Течи истя жо кортатано важодемань таркатнень улемадост ды седе, кода важодить минек предприятиятне: те сынст пештемась, комплектующейтнень ды анокставкстнэнь пачтямось, миематне», – тешкстызе республикань руководителесь.
МР-нь Экономикань, микшнемань ды предпринимательствань министрань полавтыцясь Александр Анохин пачтясь, регионсонть свалшкань лувсо ветяви розницань питнетнень ванномась. Потребителень рынкасонть товартнэнь лангс розницань вешемась сась нормас, дефицит арась. Республикасонть товартнэнь таштавксось саты 30-100 чис – оптовой звенасонть, 8-65 – розницасонть. Ярсамопельтнень лангс питнетнень валгтоманть туртов ютавтовить ярмункат, иенть ушодовомсто республикань весе енкстнэсэ ульнесть 2296 ярмункат.
Мордовиянь Велень хозяйствань ды продовольствиянь министрась Александр Кечайкин евтнесь, кода моли важодемась велень хозяйствань производительтнень субсидированиянть коряс. Чадыковсто явозь 655 млн целковойть субсидият, иенть ушодовомсто – 950 млн. Бути Россиянь келес субсидиятнень тевс нолдамось – 25%, Мордовиясо – 52%. Истя жо ютавтови важодема льготань кредитованиянть коряс, получазь 6,6 млрд целковойть льготань кредитт (5% иезэнзэ). Системань теиця предприятиятнень туртов максозь кредитт 2,6 млрд целковойтнень питнесэ.
Регионсонть поладовить тундонь паксянь тевне – видезь 140 тежат гектарт сюронь ды сюронь-бобань культурат, 52% тевтне уш топавтозь.
Мордовиянь Строительствань ды архитектурань министрась Алексей Гришакин пачтясь строямонь отраслясонть молиця тевтнеде, строямонь материалтнэнь лангс питнетнеде. Панжиковонь 1-це чистэнть саезь валгтозь ипотекань кредиттнэнь коряс льготань ставкатне (ульнесть – 12%, кармасть – 9%), истя жо кредитэнь сехте покш суммась покшолгавтозь 15 млн целковойс. Нолдазь тевс IT-специалисттнэнь туртов льготань ипотекась (5% иезэнзэ, кредитэнь сехте покш суммась – 9 млн целковойть). Отраслянь специалисттнэнь пельде уш кармасть само яволявтомат.
МР-нь Эрицятнень социальной ванстомань, трудонь ды занятостень министрась Игорь Князьков евтнесь эрицятнень занятостень сферантень государстванть пельде явовиця лезкстэнть. Регионсонть 945 ломанть важодить нурька шкань важодемань таркатнесэ, арсеви теемс эште 256 истят важодемань таркат, общественной тевтнень топавтоманть туртов теезь 375 таркат. Теде башка, моли 130 ломантнень тонавтомась, важодемань таркатнень максыцятне каясть яволявтомат эште 87 ломантнень тонавтомадост.
«Важодемань рынкасонть тевтне ванновить эрьва чинь лувсонть. Системань теиця ды градообразующей предприятиятнень важодицятнень пельде занятостень службав пачтямот эзть са. Тевтеме аштицятнеде ней кавксть седе аламо ютазь иенть коряс. Вакансиятнень базасонть – 7 тежат важодемань таркат», – тешкстызе ведомствань руководителесь.
Промксонть прядовомга Мордовиянь Прявтось тешкстызе, республикань отраслянь весе министерстватнень коряс эряви ваномс господдержкань од енкстнэнь тевс нолдамост мельга, улемс федеральной весе программатнесэ.
Мордовия Республикань Прявтонь пресс-службась