Кенярксчинь мероприятиянтень пурнавозетненень поздоровонь валт видеонть вельде евтась Россиянь Федерациянь гражданской оборонань тевтнень, чрезвычайной ситуациятнень ды пертьпельксэнь зыянтнэнь витемань коряс министрась Александр Куренков. Сон тешкстызе, толонь мадстемань тевень историянть юрсо аштить поколениятнень ды династиятнень ине тевтне.
«Толось – а ванстыця стихия. Сонзэ марто бороцямосонть изни ансяк отвагась ды профессионализмась. Те варчамонть маштыть ютамо ансяк кеме ойме ломантне, конатнень виев обуцяст ды оляст. Вечкевикс ялгат, сюкпря тенк вадря важодеманть ды эсь вийтнень а ванстоманть кисэ! Ды коенть коряс – коське рукават!»
Паломатнеде ванстомань сотрудниктненень поздоровонь евтамсто, Артём Здунов тешкстызе: «Паломатнеде ванстомась – те аволь ансяк чинь-вень перть толонть каршо аштемась. Те башка ломантнень историясь, кить певтеме кемевикст эсь тевентень. Республикань толонь мадстицятне профессиональной покш уровнясо ютавтыть идемань тежат операцият, эрьва кодат иетнестэ честь марто цидярдызь стака варчамотнень, истя жо аномальной паломатнень ды покш чадыведьтнень».
2023 иестэ Мордовиясо мадстезь 2338 паломат, идезь 86 ломанть, ютавтозь эвакуация тежадо седе ламотнень туртов. Течи регионсонть важодить паломатнеде ванстомань весе видтнэнь 100 седе ламо подразделеният ды авариянь-идемань теевкст, конатнесэ важодить 1600 седе ламо ломанть. Те федеральной противопожарной службань сотрудниктне, субъектэнь, муниципальной, ведомствань пожарной ванстомань важодицятне, истя жо доброволецтнэ. Сынст вооружениясо – толонь мадстемань сехте неень шкань техникась.
Тешкстазель, меельце шкастонть удалась редявикстэ одкстомтомс толонь мадстемань ды идемань автомобильтнень парконть, рамазь неень шкань техникань 120 седе ламо единицат ды пожарно-технической оборудования. Строязь неень шкань инфраструктурань объектт, ды те важодемась поладови.
Артём Здунов тешкстызе, маласо шкастонть эряви прядомс эрицятненень кулянь пачтямонь региононь автоматизированной системань тееманть. Текень марто, меельце иетнестэ Мордовиясо теезь толонь мадстемань-идемань спортонь виевгавтоманть туртов, спортсментнэнь-прикладниктнень цела иень перть анокстамонть ды сехте покш уровнянь пелькстамотнень ютавтоманть туртов масторсонть сехте вадря базатнестэ вейкесь. Те од ломантнень военно-патриотической воспитаниянь прявт пелькс.
Мордовиянь Прявтось истя жо тешкстызе паломатнень профилактикань ды а нолдамонь коряс важодемань эрявиксчинть – сон ашти васенце таркасо. Целанек удалась топавтомс паломатнень киртямонть эрямонь секторсо, велень хозяйствань объекттнэсэ, производственной зданиятнесэ ды социальной енксонь объекттнэсэ. «Алкуксонь важодеманть вельде тынь сайтядо вадря тарка Россиянь регионтнэнь противопожарной часттнень ютксо ды правань коряс тенк явови минек республикань эрицятнень кемемась, – мерсь региононь руководителесь. – Мордовиянь противопожарной службань ды МЧС-нь коллективентень праванть коряс мереви кирдемс каштанчи эсь сотрудниктнень, сынст важодемань цетавкстнэнь коряс. Кирдемань башка валт минь евтатано цератненень, кить топавтыть тевест специальной военной операциянь таркатнесэ».
Меельцекс Мордовиянь Прявтось тешкстызе, ломантнень седейтнес свалшкас кадовить сеть, кить эсь эрямост питнесэ идить лиятнень.
Кенярксчинь церемониянть лувсо службань сехте вадря сотрудниктненень ды ветерантнэнень явшезь покш наградат. Истя, «Заслуженный работник пожарной охраны Республики Мордовия» почетонь лемесь максозь Россиянь МЧС-нь ветеранонтень Евгений Ляпиннэнь. Службань шкань перть сон ютась ки Госпожнадзоронь инспекторстонть саезь МР-нь гражданской оборонань ды чрезвычайной тевтнень коряс министрань васенце полавтыцянть видьс.
Почетонь лемесь истя жо максозь Теньгушевань енкссто 24№ пожарной частень караулонь прявтонтень Владимир Буртасовнэнь ды Покш Игнатовань енкссто 11№ пожарной частень водителентень Николай Захаровнэнь. Мордовия Республикань Прявтонть пельде службань весе ветерантнэнень явшезь цецят.
Те чистэнть пожарной охранань сотрудниктненень поздоровт евтасть МР-ва прявт федеральной инспекторось Анатолий Гулин, Саранскоень ды Мордовиянь митрополитэсь Зиновий.
МР-ва Россиянь МЧС-нь Главной управлениянь прявтось Сергей Репин евтась сюкпря республикань руководствантень ды федеральной ведомствантень кирдеманть ды службань технической оснащениясо лездамонть кисэ.
«Толонь мадстицятнень поколениятне стить толонть каршо бороцямонтень. Эрьва эрямось минек туртов питней ды эрявикс! Масторлангсонть минек важодемась сехте вадря – минек профессиясь паро, валдо, ванькс! Структурасонть служамонь иетне – эрямонь пек питней иеть! Сюкпрянь валт тынк ютксто эрьвантень!» – мерсь МР-ва Россиянь МЧС-нь Главной управлениянь руководителесь.
Мордовия Республикань Прявтонь пресс-службась