"Технопарк Мордовия" АУ-нь генеральной прявтось Андрей Николаев евтнесь Инжинирингень куншкакуронь структурадонть, тевтнеде, конатнень сон топавты, сы шкантень арсематнеде. Башка мель явозель оптической волокнань теемань технологиянтень.
«Минек куншкакурось арси-аноксты ды нолды оптической волокна, тесэ тееви спецволокнань производствань технологической пешксе циклась: анокставкстнэнь-преформатнень эйстэ саезь вытяжкас ды анок продукциянь варчамос. Теке шкане Мордовиясо важоди "Оптиковолоконные Системы" АО-сь – телекоммуникационной оптической волокнань нолдамонть коряс Россиянь келес вейкине завод. 2021 иестэнть заводось сайсь отечественной рынкань 30 ламо процентт. Заводонь продукциясь вадрячинть коряс кирди конкуренция омбо масторонь аналогтнень марто», – толковизе Андрей Николаев.
Волоконной оптикань инжинирингень куншкакуронть юрсо арсеви теемс башка подразделения – телекоммуникационной оптической волокнатнень коряс ванкшномань-тонавтнемань ды анокстамонь-арсемань куншкакуро.
Мордовиянь Прявтось Артём Здунов тешкстызе, преформатнень нолдамось пек эрявикс виевгавтомань государственной прявт проекттнэнь, истя жо «Цифровая экономика» нацпроектэнь топавтоманть туртов.
Андрей Яцкин тешкстызе, прявт енкстнэнь ютксо, конатнень невти Мордовиясь, башка мель эряви явомс волоконной систематнень виевгавтомань коряс проектэнтень. «Весе масторонть туртов те прявт проектэнть топавтомасо лезкс явить Интеллектуальной ули-паронь коряс советэсь ды Федерациянь Советэсь. Васняяк кортамось моли преформатнень нолдамонь коряс заводтонть. Те пек эрявикс енкс, седе пек течи, санкциятнень лепштямонть лувсо».
Теде мейле Федерациянь Советэнь Председателень васенце полавтыцясь Андрей Яцкин ваннызе Мордовиянь научно-промышленной потенциалонь выставканть. Башка проекттнэнень явови Федерациянь Советэнь лезкс.