Региононь руководителесь тешкстызе «Иень тонавтыця» пелькстамонь таликанть, конась ютавтови уш колоньгеменцеде. Те аволь ансяк педагогонь шкинемань пелькстамот – те площадка, косо кемекставить педагогической од решениятне, важодемас саевить од методикатне.
«Изнязть тесэ арасть, – мерсь Артём Здунов. – Секс мекс тевс нолдавить од технологиятне, пелькстамось максы педагогтненень возможность варштамс, кода важодить лиятне – ней а мереви пекставомс ды пидевемс эсь потмовийсэнть. Прявтось: тонавтыцятне нежедевельть сехте виевтнень лангс».
Мордовиянь Прявтось тешкстызе, регионсонть тееви неень шкань тонавтомань инфраструктура. Тедеде панжовить колмо школат. «Весе те ансяк кев ды кирпець, мезе карми тосо ломаньтеме? Совавтомс зданиянтень ойме – вана те покш важодема, – мерсь сон. – Минек прявт тевесь: куш-кона эйкакшонтень, республикань куш-кодамо таркасонть максовозо вадря образования». Пелькстамонь республикань пелькссэнть ульнесь 21 педагог районтнэстэ ды Саранск ошонь округсто – муниципальной пелькстнэнь изницятне.
Пелькстамонь варчамотнень лувсо кочказь вете суперфиналистт, конат поладсть пелькстамо Мордовия Республикань сехте вадря тонавтыцянь лементь кисэ. Те: 1. Юлия Ермакова, Рузаевкань 9№ школань рузонь келень ды литературань тонавтыцясь; 2. Елена Журавлева, Саранск ошонь округонь 27№ школань биологиянь тонавтыцясь; 3. Любовь Конышева, Инсаронь 1№ школань вишка класстнэнь тонавтыцясь; 4. Михаил Ошкин, Ташто Шайговань школань физкультурань тонавтыцясь; 5. Людмила Темаева, Чаунзань енксонь Комсомольскоень 2№ школань рузонь келень ды литературань тонавтыцясь.
Мордовиянь Прявтось явшесь суперфиналисттнэнень дипломт ды ярмаконь премиянь получамс сертификатт. «Мордовия Республикань 2024 иень тонавтыця» пелькстамонь изницякс кармась Юлия Ермакова, Рузаевкань 9№ школань рузонь келень ды литературань тонавтыцясь. Сон карми невтеме Мордовия Республиканть те иень ожоковсто «Россиянь 2024 иень тонавтыця» пелькстамонь финалсонть.
Пелькстамонь весе участниктненень поздоровт истя жо евтасть Саранскоень ды Мордовиянь митрополитэсь Зиновий ды пелькстамонь жюринь председателесь, Народной образованиянь ды наукань важодицятнень профсоюзонь Мордовия Республикань организациянь председателесь Юрий Базов.
Мордовия Республикань Прявтонь пресс-службась