Чадыковонь 13-це чистэ Мордовиясо важодемань содавтомань коряс улемстэ ПФО-со Россиянь Президентэнть полпредэсь Игорь Комаров ды Мордовиянь Прявтонть тевтнень топавтыцясь Артём Здунов якасть «Биохимик» заводонтень - антибактериальной ды противовирусной препараттнэнь нолдамонть коряс отечественной фарминдустриянь лидертнэстэ вейкентень. Заводось прими участия масторонь лекарствань безопасностень топавтомань коряс прявт тевтнень витемасо, истя жо импортонь полавтомань программанть лувсо, нолды инновационной лекарствань средстват. Эрьва иестэ линейкасонть появить эрьва кодат орматнень лецямс малав 60 од препаратт. Истя, 2020 иестэнть заводсонть колмо ковонть перть анокстазь ды нолдазь коронавирусонь инфекциянть каршо противовирусной препарат Арепливир.
Предприятиянть важодемадонзо полпредэнтень евтнесть «ПРОМОМЕД» ГК-нь прявттнэнь Советэнь председателесь Петр Белый ды «ПРОМОМЕД» ГК-нь совиця «Биохимик» АО-нь исполнительной прявтось Дмитрий Земсков. Петр Белый тешкстызе, ней заводсонть анокстави од антибиотик, ды те иенть прядовомсто кармить нолдамо препарат онкологиянь орматнень лецямс.
Заводсонть Игорь Комаров ды Артём Здунов ваннызь од поколениянь антибиотиктнень производстванть туртов активной фармацевтической субстанциятнень нолдамонть коряс цехенть ды научно-производственной площадканть, косо арсить-анокстыть од лекарстват.
Россиянь медицинань учреждениятнень вешемаст топавтоманть туртов 2020 иень таштамковсто саезь заводось 10-ксть ламолгавтызе Арепливирэнь нолдамонть – 100 тежасто 1 млн упаковкас ковозонзо; тевс нолдавить од вийть ковозонзо 2 млн упаковкатнень нолдамонть коряс.
Истя жо 2021 иень даволковсто тесэ панжовсь ампулатнень нолдамось (площадесь 2700 кавонзазь метрат), путозь од оборудования, те лезды кавксть покшолгавтомс ампуласо анок лекарствань средстватнень нолдамонть – 15 млн единицат ковозонзо (173 млн ламо ампулат иезэнзэ). Нолдавиця препараттнэнь ютксо: Эноксапарин ды Надропарин, пек эрявить COVID-19 лецямсто, Дексаметазон ды госпиталень лия препаратт.
2020 иень омбоце пельксэстэнть «Биохимик» АО-сь 32% покшолгавтызе коронавирусонь инфекциянь кадовкстнэнь лецямонть туртов антибиотиктнень нолдамонть.
Мордовия Республикань Прявтонть пресс-службась