Мероприятиясонть ульнесь Мордовиянь Прявтось Артём Здунов.
Геннадий Москалевонь тиринь кудонзо ваксс, косо эрить тетязо-авазо, пурнавсть Инсаронь енксонь эрицятне, весе, кить содылизь маштовозь воинэнть. Седе, кодамо ломанекс сон ульнесь, евтнесь сонзэ ялгазо – отставксо полковникесь Владимир Босин, истя жо Михаил Вишняков – Инсаронь аграрной техникумонь икелень прявтось, тосо тонавтнесь Геннадий.
Мордовиянь Прявтось евтась сюкпря весенень, кить састь героенть ледстнеме. «Сюкпря тей самонть кисэ. Минек туртов прявтось – вейсэндявомс аволь ансяк кеняркстнэсэ, истя жо зыянтнэсэ, – мерсь Артём Здунов. – Пшкадян тетянтень-авантень: те тынк покш таликась, тынь триде-кастыде Отечествань истямо цера. Секс мекс улить лия ломанть, кить трить-кастыть сеть нацисттнэнь, конатнень марто ней миненек сави бороцямс, штобу сынь иляст каяво тей, иляст машто минек семиятнень, минек эйкакштнень. Истят ванстыцятне, кода Геннадий Александрович, а нолдасызь тень теемс. Минек геройтненень – свалшкань слава».
Героенть ледстизь чатьмонемань минутасо. Геннадий Москалевонь лемензэ марто мемориальной лазонтень путозельть цецят. Артём Здунов вастневсь Геннадий Москалевонь тетянзо-аванзо – Раиса Петровнань ды Александр Даниловичень марто. Сынь пенсионерт, цераст маштовомадонть мейле пек лавшомгадсь шумбрачист. Мордовиянь Прявтонть кармавтоманзо коряс сыненст явови эрявикс весе лезксэсь, истя жо республикань социальной ванстомань министерстванть ды шумбрачинь ванстомань министерстванть коряс.
Мордовия Республикань Прявтонь пресс-службась