Ожоковонь 27-це чистэ Мордовиянь Прявтось Артём Здунов ютавтсь важодемань вастовома «Сарансккабель» ООО-нь ды «Эпромет» ООО-нь азоронть Владимир Матыцын марто. Кортавсть инвестициянь проекттнэ ды кабелень отраслянь виевгавтомань кевкстематне.
Региононь руководителесь тешкстызе, Мордовиянь кабельщиктне - промышленностень флагмантнэстэ вейкесь. Отраслясь эрязасто виевгады республикасонть уш 20 иетнень перть. Покш перспективат панжи икелензэ цифровой экономикань теемась. Ней эряви кастомс нолдазь продукциянь покшолматнень, теемс вадря зарплата марто важодемань таркат ды панжомс важодемань од енкст.
Те иень 9 ковтнень перть «Сарансккабелесь» невтсь 110% касома ютазь иенть коряс, «Эпрометэсь» - 115%. Заводтнэнь продукциясь пачтяви СНГ-нь 7 мастортнэс, истя жо Монголияв ды Литвав. Кортамось истя жо мольсь алюминиень катанканть нолдамодонзо - те сови Мордовия Республикань прявт проекттнэнь юткс. Те енксонть коряс инвестициятнень покшолмаст 1 млрд целковойде ламо. Теезь 150 важодемань таркат.
Важодемань вастовомасонть ульнесть МР-нь Правительствань Председателень васенце полавтыцясь Игорь Фрейдин ды МР-нь Промышленностень, наукань ды од технологиятнень министрань тевтнень топавтыцясь Игорь Губайдуллин.
Мордовия Республикань Прявтонь пресс-службась