Лямбирень енксось - региононь прявт районтнэстэ вейкесь: сон ашти прявтошонть маласо, самай тесэ теезь ды виевгавтови экономикань башка зонань площадкась. Мелень важодемань невтевкстнэ ды сыця шкантень прявт тевтне кортавсть даволковонь 11-це чистэ райононь депутаттнэнь советэнь сессиясонть. Сонзэ важодемасонзо ульнесть Мордовиянь Прявтось Артём Здунов, региононь Правительствань председателесь Батыр Эмеев, МР-нь Прявтонь ды МР-нь Правительствань Администрациянь руководителесь Булат Хайрутдинов, министратнень кабинетэнтень совицятне, райононь общественностень, бизнесэнь ды социальной енксонь представительтне.
Сессиянть ушодовомадо икеле региононь руководителесь ваннызе райононь изнявкстнэнь выставканть – тесэ семиянь бизнесэсь, экотуризмась, «Дормаш» велень хозяйствань производствась, истя жо Лямбирень эрицятне невтизь гуманитарной лезксэнть, конань анокстыть фронтонть туртов.
Райононть касомадо-кепетемадо пачтясь муниципальной образованиянь прявтось Инсаф Хайруллин. Районсонть эрязасто касы-кепети предпринимательствась, касы зарплатась, алкине уровнясо ашти тевтеме аштемась, ветяви ули-паронь объекттнэнь инвентаризациясь, инфраструктурань виевгавтомась ды ОЭЗ-нть туртов резиденттнэнь вешнемась.
Районсонть бюджетэнь ютавкстнэнь покш пельксэнть саи социальной енксось - малав 75 %. Тедеде «Развитие образования» госпрограмманть коряс арсеви прядомс Лямбирень 2 № СОШ-нь витнеманть. Педе-пев витнема эрявить эште кавто школатненень ды кавто эйдень кужотненень.
Районось эрязасто топавты «Культура» нацпроектэнть - тень вельде педе-пев витнезь Коммунар посёлкасонть Культурань кудось, Панжозь модельной кавто библиотекат ды Лямбирьсэ кинозал, теезь ламо функциянь культурань куншкакуро. «Комплексное развитие сельских территорий» госпрограмманть лувсо педе-пев витнезь «Алмаз» культурань-спортонь куншкакурось ды Покш Елховкань велень клубось. Культурань вейксэ кудотне одкстомтызь материально-технической юронть. 2026 иестэ арсеви витнемс Культурань кудонть Болотникова велесэ.
Покш мель явови шумбрачинь ванстомань объекттнэненьгак. Мелят «Модернизация первичного звена здравоохранения» нацпроектэнть коряс педе-пев витнезь 2 № поликлиникась, рамазь медоборудования. Тедеде ФАПт теевить Кривозерье ды Александровка велетнесэ, Покш Елховка велесэ - врачонь амбулатория.
Покш важодема райононтень эряви топавтомс жилищно-коммунальной хозяйствань ёнкссо: эряви одкстомтомс ведень пачтямонь ды ведень отведениянь сетенть (таштомгадомась 90%), эряви строямс ванськавтомань 10 сооруженият.
Нолдазь отходтнэнь обработкань коряс инновационной заводось - сонзэ строямс инвестициятне кармасть 2 млрд седе ламо целковойть.
Районось невтсь вадря цетавкс догазификациянь коряс - вете иетнень перть газ нолдазь 1027 кудотнес, очередсэ – 150 седе ламо.
Прявт ёнкстнэнь ютксо, конатнень яволявтынзе райононь руководителесь, – китнень витнемась, туризмань виевгавтомась, таркатнень вадрялгавтомась-мазылгавтомась, СВО-нь участниктненень ды сынст семиятненень лездамось, демографиянь тевтнень вадрялгавтомась ды эйкакш марто семиятненень лездамось.
Артём Здунов эсь кортамосонзо тешкстызе, Лямбирень енксось – республиканть туртов прявттнэстэ вейкесь: «Мелят районось важодсь аволь беряньстэ – социально-экономической невтевкстнэнь топавтомаст коряс саи омбоце тарка республиканть келес. Ансяк касоманть туртов таштавкстнэ покшт!»
Районось невти касома эсь доходтнэнь покшолгавтоманть коряс, налогонь долктнень, кредиторской задолженностень киртямонть, ули-паронь объекттнэнь инвентаризациянть коряс вадря лув. Руководствантень ёвтазель мель седе эрязасто нолдамс тевс муниципальной долгонь каямонь коряс механизматнень, кастомс прявт капиталс инвестициятнень. Те важодеманть эряви ветямс свалшкане.
Мелят районсонть витнезь китнень малав 22 вайгельбеть. Одкстомтомс эряви местной смустень ламо кить, тень пингстэ зярыя участкатне улест васенце таркасо.
Артём Здунов тешкстызе, муниципальной образованиянь руководителесь макссь сонензэ прявт кевкстематнень марто альбом: «Те альбомонть максса важодеманть туртов минек Правительствантень – те тевдеемантень руководства. Ды эряви толковамс ломантненень, зярдо те весемесь ули теезь».
Сессиянть лувсо истя жо кортасть демографиянь, чачтоматнень ламолгавтомань, эрицятнень шумбрачист ванстомань ды диспансеризациянь ютавтомань кевкстематнеде, райононь эрицятнень ютксо эрямонь шумбра лувонть кемекстамодо, СВО-нь участниктнень марто вейсэнь тевдеемадо.
«Важодемась ладязь вадрясто, - тешкстызе Мордовиянь Прявтось. - Карматано лездамо ды вейсэ важодеме стака тевтнень лангсо. Весементь сехте паронть Лямбирень енксонтень».
Мордовия Республикань Прявтонь Пресс-службась