Тедеде республикань выставкань стендсэнть невтезь 20 компаниятнень продукциясь. Светотехникань продукциянть невтить сеске зярыя предприятиятне: А. Н. Лодыгинэнь лемсэ НИИИС-сь, «Рефлакс-С», «Ардатовский светотехнический завод» ды «Санлайт» чипаень панельтнень производителесь. Россиянь технологиянть коряс чипаень менчевиця модультнень нолдамось ладязь Саранскойсэ те иень чадыковсто. Нолдавиця продукциянь лезэвчись седе покш импортонь ламот аналогтнень коряс: шождат, човинеть, ансяк текень марто виевть панельтнень мереви путомс эрьва ков, нолдамс тевс ЖКХ-со ды велень хозяйствасо. Кабелень промышленностенть стендсэнть невтизь «ЭМ-Кабель» ды «Сарансккабель» компаниятне. «Плайтерра» – республикасонть фанерань икеле молиця производителесь, ды «Лато» усксть форумов строямонь материалт. «Завод Промметизделий» невтинзе кшнинь мебеленть ды ванстомань систематнень.
Шожда промышленностесь редявикстэ невтезь текстилень производстватнесэ, истя жо «ЭкоТавла» брендэнть ало хозяйственной ды туалетной сапонень ды «Легенды Мордовии» брендэнть ало косметикань продукциянь производительтнесэ. Коенть коряс «KazanForumсо» покш мель явови Мордовиянь перерабатывающей промышленностень продукциянтень – кондитерской теевкст, органической производствань ямкст, ловсонь ды консервань продукция, халялень сывелень деликатест.
Россиянь Правительствань Председателень Полавтыцянтень истя жо невтизь Мордовиянь визитной карточканть - «Ростр» ды MORWOOD компаниятнень мореной тумосто лиятнень енов а молиця продукциянть, истя жо INCRUA производствань натуральной кевтнестэ теевкстнэнь.
Стендэнь ванноманть прядовомга ютавтовсь Артём Здуновонь ды Марат Хуснуллинэнь важодемань вастовомась. Кортавсть региононь виевгавтомань ды инфраструктурань зярыя проекттнэнь топавтомань кевкстематне.
«Россия – Исламский мир: KazanForum» раськеютконь экономической форумось тешксты масторлангонь аренасонть Россиянь регионтнэнь возможностест невтеманть туртов редявикс площадкань статусонть. Панжовозь Russia Halal Expoсо келейстэ невтезь минек субъекттнэ. Сынст ютксто эрьвась невти эсензэ лия енов а молиця инвестиционной ды туристической потенциалонть. Истя жо ванны Мордовиянь стендэнть ды ютавтынь вастовома республикань Прявтонть Артём Алексеевич Здунов марто. Коллеганть марто кортынек ды тешкстынек башка эскелькст региононь седе тов социально-экономической виевгавтоманть коряс. Кеман, ютавтозь важодемась максы вадря вачкодькс минек вейсэнь тевенть топавтоманть туртов – ломантнень эрямост вадрялгавтоманть», – мерсь Правительствань Председателень Полавтыцясь Марат Хуснуллин.
Мордовия Республикань Прявтонь Пресс-службась