Аштемковонь 10-це чистэ Мордовиянь Прявтонь тевтнень топавтыцясь Артём Здунов видеосвязь вельде ютавтсь коронавирусонь орманть а нолдамга оперативной штабонь промкс. Кортавсть эпидемиологической тевтне, кода моли ливксэнь путомась, кода важоди здравоохранениясь, кода кирдевить санитарно-эпидемиологической вешематне.
Региононь прявтось тешкстызе, коронавирусонь инфекциянь сравтовомась ашти текесь. «Паро ёнов полавтомат минь а нейтяно, – мерсь Артём Здунов. – Оймамс а эряви, ковидэнь стационартнэсэ малав 400 сэредицят, недлянь перть «якстере зонасо» аштить 10 районт».
Тюремс зыянов орманть марто лезды вакцинациясь. Ливксэнь путомась республикасо моли планонь коряс, теде пачтясь вице-премьерэнь тевтнень топавтыцясь Галина Лотванова. Тей сы сатышка вакцина, сон лезды ванстомс ломантнень эрямост.
МР-нь здравоохранениянь министрань тевтнень топавтыцясь Олег Маркин ёвтнесь оперативной штабонтень тевтнеде, конат молить ковидэнь госпитальтнесэ.
«Минек ламо примерт, зярдо реанимациясо аштить семиянек. Вейкесь кулы, лиясь пички. Ды кода ломантне янксить, мекс эзть юта вацинация ды эзть путовто ливкст малавиксэст туртов, конат тусть эрямосто! – мерсь Олег Маркин. – Бути ломанесь эзь тее ливкс, сон ормалгады. Паряк, арсетядо, сэредиде ды ормась тенк а педи, те а истя! Коронавируссо сэредицятнень эйстэ 10 проценттнэ – ормалгадсть омбоцеде, улить истят, кить понгсть реанимацияв ды натой тусть эрямосто. Вакцинась максы виев ванстома коронавирусонь ормадонть. А кемицятне, сеедьстэ од ломантне, арсить, шождасто кармить сэредеме. Ансяк сыненст а эряви стувтнемс тетядост-авадост, малавикстэст. Минек вакцинась – модамасторсо сехте виев ды лезэв. Тень нейтяно эсенек лангс ванозь».
Эксперттнэ кортыть, самай ней, сёксень самодо икеле эряви теемс коронавирусто ливкс. Сёксня ушодови гриппте вакцинациясь. Ливкстнэнь эрявить теемс аволь ве шкасто.
Оперштабонь промкссо прявт темакс ульнесь отпусконь шкасто зыянонь а нолдамось. Башка мель эряви явомс эйкакштнень оймсемантень.
«Исяк мон ванынь школань кизэнь вейке лагерь. Кода уш икеле кортынек, эйкакштненень эряви ютавтомс те шканть лезэвстэ ды пурнамс содамочить. Тесэ лездыть МЧС-сь, волонтертнэ, медиктне – саемга, тонавтсызь эйкакштнень максомс медицинань васенце лезкс. Теде башка, пштистэ ваномс кизэнь лагертнесэ андоманть ды сынст ваноманть мельга. Миненек эряви сеске витемс асатыкстнэнь», – тешкстызе Мордовиянь Прявтонь тевтнень топавтыцясь.
Оперативной штабонь промкссо кортызь аштемковонь 12-це чистэ Россиянь чинть, Саранскоень 380 иетнень ды Рузаевкань 390 иетнень тешкстамонть. Сынст эряви ютавтомс санитарно-эпидемиологической вешематнень кирдезь.
Теде башка, оперштабсо яволявтсть аштемковонь 26-це чистэ «Сабантуй» раськень-фольклоронь кенярксчинь ютавтомадо, сон карми Лямбирень райононь Аксенова велесэ.
Мордовия Республикань Прявтонь Пресс-службась