«Мордовиясь – спортонь прявтош: регионсонть ламо спортонь объектт, ансяк ламо функциянь комплексэсь минек васенце – тесэ вейке таркасо хокеень покш корт ды кавто бассейнат. Те пек вадря!» – тешкстызе региононь руководителесь.
Артём Здунов мерсь, комплексэнть эряви нолдамс тевс весе вийсэнзэ: тей сакшновольть аволь ансяк райононь ды республикань эрицятне, истя жо ютавтовольть спортонь учебно-методической сборт лия регионтнэстэ. «Спортонь эрямось тесэ молезэ весе вийсэнть. Покш изнявкст ды уцяска!» – мерсь сон.
Строямось ветявсь 2019 иестэнть саезь, питнезэ малав пель миллиард целковойть.
Якстере парсейненть республикань Прявтонть марто керизь Финаевтнень семиясь. Настя ды Никита эйкакштне вадрясто топавтызь те тевенть.
Спортонь дворецсэнть кавто бассейнат, тренажеронь, фитнес- залт ды эень арена. Сонзэ эйстэ ушодовсь комплексэнь ванномась.
Мордовиянь Прявтось ваннызе эенть ды макссь ушодкс хокеень матчонтень. Эсь ерокчист невтизь «Слобода» клубонь ветерантнэнь командась ды МР-нь Правительствань сборной командась. 150 таркас трибунась пешксель.
25 метрань бассейнасонть весе 6 яннэтнень саизь спортонь ведень видтнэнь вечкицятне. Валдо, покш бассейнась теезь неень шкань вешематнень коряс, важоди медицинань сестрань пост. Вадрясто теезь эйкакшонь бассейнась.
Мордовиянь Прявтось истя жо ваннызе тренажеронь залонть, косо путозь эрьва кодамо инвентарь. Кода тешкстызь тренертнэ, истямо «кшни» арась республикань вейкеяк районсонть.
Тешкстасынек, проектэнь топавтоманть коряс арсеви эрямонь весе пунктонь комплексной строямось. Сон сови Краснослободскоенть марто вейкине агломерацияс.
Эрямонь таркатнень строямонть туртов тесэ анокстазь 130 ламо модань участкат, ули коммунальной эрявикс весе инфраструктурась. Сы шкастонть тесэ карми эрямонь неень шкань квартал.
Мордовия Республикань Прявтонь пресс-службась