Якшамковонь 12-це чистэ Культурань инициативатнень Президентэнть фондонь генеральной прявтось Роман Карманов ваннызе И.Д.Воронинэнь лемсэ республикань краеведениянь музеень экспозициянть. Экскурсиянть шкасто инжентень невтизь культурань коряс республикань зярыя инициативатнень.
Истя, кортамось мольсь «Шумбрат» эрзянь-мокшонь раськень общественной организациянть проекттэнть, конань лувсо арсеви ютавтомс регионъютконь этнокультурной фестиваль Россиянь сеть енкстнэсэ, косо эрить эрзят ды мокшот, те лезды ванстомс ды сюпалгавтомс раськень кельтнень ды культуранть. Истя жо «Легенды дворянских усадеб» краеведениянь музеень проекттэнть, конась топавтови грантонь ярмакнень лангс.
Теде башка, Культурань инициативатнень Президентэнть фондонь генеральной прявтось ваннызе музеень од экспозициянть, конась алтазь Мордовиянь автономиянь теевемань чистэнть 92 иетнень топодемантень.
"Музейсэнть невтезь экспозициясь, - те покш путовкс Мордовия Республикань историянь ванстомантень, конась невти региононть ды тесэ эриця раськетнень кастомань-кепетемань весе пелькстнэнь. Музеесь - республикань эрицятнень ды инжетнень пурнавома тарка, те покш сюпавчи, конань эряви ванстомс ды пачтямс эйкакштненень-нуцькатненень", - мерсь Роман Карманов.