Медьковонь 16-це чистэ Мордовияв сакшнось Россиянь Правительствань Председателень полавтыцясь Марат Хуснуллин.
Республикань Кудосо ютась Марат Хуснуллинэнь ды Мордовиянь Прявтонь тевтнень топавтыцянть Артём Здуновонь вастовомаст. Кортызь «Жилье и городская среда» ды «Безопасные и качественные автомобильные дороги» регионсо национальной проекттнэнь топавтомаст коряс кевкстематнень.
Истя жо Марат Хуснуллин Республикань кудосо ветясь региононь социальной-экономической виевгавтоманзо коряс промкс. Кортызь республикасо инвестиционной од проекттнэнь топавтомаст, бюджетэнь ветямонть, эрямо таркань ды килангонь стявтоманть, истя жо кортызь жилищно-коммунальной хозяйстванть ды сексентень-телентень анокстамонть.
Вице-премьерэсь тешкстызе, федеральной центрась ашти региононть виевгавтоманзо кисэ. «Республикань бюджетэнь покш долкось – те покш сталмо ды сонзэ лангсо эряви важодемс. Мордовиянь эрицятне иляст пиштевте те сталмодонть, региононтень эряви касомс, - мерсь Марат Хуснуллин. – Мон сынь паро куля марто – исяк Правительствась явсь республикантень ярмаконь башка лезкс – 1,5 млрд. целковойть».
Теде башка, кавто недлядо икеле региононтень састь эштё ярмакт (500 млн. целковойть) килангонь витнемс – Мордовиянь Прявтонь тевтнень топавтыцясь ёвтась Россиянь Президентэнтень ды Правительствантень сюкпря те пек эрявикс лезксэнть кисэ – сынь туить муниципалитеттнэс, киланготнес, паролгавтовить порксазь-яжазь килангонь таркатнестэ малав 50 вайгельбеть.
«Весемезэ тедеде федеральной бюджетэсь макссь региононтень лезкс 7 млрд. целковойть – ды тень лангс минь а лоткатано, - тешкстызе Марат Хуснуллин. – Россиянь Правительствась арси лездамс Мордовиянтень, минь нейтяно управленческой командань паро важодеманзо. Республикась а веши ярмакт, сон важоди сонсь, саемга, кемекстась зярыя иес социально-экономической виевгавтомань коряс комплексной программа. Истя жо мон кирдян тынк меленк теемс Саранск – Рузаевка агломерациянть, те карми транспортонь пек паро молема».
Мордовиянь Прявтонь тевтнень топавтыцясь Артём Здунов тешкстызе: васенце пельиень цётамотнень коряс эрямо таркань стявтомась кассь 104 %. «Монь койсэ, важодемантень улить покш резерванок: те уроз эйкакштненень квартират, ташто кудотнестэ паро кудос ютамось, - мерсь республикань прявтось. Градостроительной советсэ минь уш кочкинек строямонь-стявтомань таркатнень. Иезэнзэ касомась улевель 5%. Те покш важодема, ды сон тееви. Строительстванть мельга виевгады стройматериалонь промышленностесь, логистикась ды целанек весе экономикась, кармить важодемань од таркат».
«Стимул» - те регионтнэсэ сехте вешевикс программась, - тешкстызе Марат Хуснуллин. – Сон важоди истя: покш ярмакт максыть сеть регионтнэнень, косо совавтыть квадратонь ламо метрат. Мордовиясь парсте невти прянзо те проектсэнть. Эйдень кужот, школат, килангот, инженерной коммуникацият – программань важодемась, минь карматано сонзэ поладомо седе тов. Исяк кемекстынек инфраструктурань бюджетэнь кредиттнэнь явоманть, те 4 иес малав триллион целковойть. РФ-нь регионтнэс ЖКХ-нь туртов явовить 150 млдр. целковойть. Артём Алексеевич аравтсь икелень кевкстема Мордовиянь пек ташто инженерной сеттнеде. Алтан, ЖКХ-нь фондсто муйтяно лезкс максомс региононтень ярмакт инженерной инфраструктурань витнемс. Команданть икеле вешемась – важодемс, анокстамс документация, вейсэндямс строительтнень, паролгавтомс заказчиктнень важодемаст. Тень туртов федеральной бюджетсэ улить ярмакт».
Истя жо промкссонть кортасть республикасо апак прядо строямонь кевкстематнеде. Кортамось мольсь Саранскойсэ Тёжа иень вейсэндямонь площадьсэ универсальной залдонть.
«Объектэнть эряви прядомс – ней уш а мезть кортамс, виде ульнесь мелесь сонзэ стявтомс эли аволь, - тешкстызе вице-премьерэсь. – Бути ушодсть стявтомо, ютавтсть ярмакт, эряви нолдамс эксплуатацияв, кадык тосо эйкакштне явить мель спортонтень. Весе неть апак прядо строямотне лиснить заказчиктнень берянь профессионализмадост, ярмаконь арасьчиде, прявттнэнь аволь паро амбициядост. Мон, кода профессиональной строитель мерян, куш кодамо объектэсь, бути сон аволь стака, эряви стявтомс колмо иес. Ды а эряви ушодомс стявтомо, бути арасть ярмакт».
Промкссонть кортызь те таркасонть стявтомань важодемань планонть-графикенть. Кода уш пачтинек, Россиянь Правительствась универсальной залонь строямонь прядомс явсь 851,8 млн. целковойть.
Мордовия Республикань Прявтонь Пресс-службась