«Удалась ладямс лезэнь кандыця вейсэнь тевдеема Правительстванть ды субъекттнэнь ютксо. Ладямс кооперациянь сюлмот, конат эрявить вишка бизнесэнтень ды покш холдингтненень. Истя жо теемс федеральной округтнесэ шабра регионтнэнь ютксо вейсэнь тевдееманть туртов лувт», – тешкстызе премьер-министрась.
Михаил Мишустин башка лоткась зярыя регионтнэнь важодемаст лангс. Истя, тешкстызе, Мордовиясо ули фармацевтической предприятия, конась нолды аволь ансяк субстанцият, истя жо лекарстват сахарной диабетсэ ды лия орматнесэ сэредиця ломантнень туртов.
Кортамось моли «Промомед» компаниятнень группань «Биохимик» АО-нь заводонть коряс. Компаниянь портфелентень совить лекарствань препараттнэнь 250 лемть, сынст ютксто 80% совить эрямонть туртов эрявикстнэнь ды пек эрявикстнэнь юткс. 2023 иень эйзюрковсто «Биохимик» АО-нть юрсо Россиянь Президентэнть Владимир Путинэнь участиянзо вельде панжовсь активной фармацевтической субстанциятнень производствань коряс заводось. 2027 иенть самс топавтовить прявт проекттнэ: теезь од участка пештезь шприцтнэнь производстванть коряс; строязь од корпус онкологиянь препараттнэнь производстванть туртов; панжови од корпус бета-лактамной препараттнэнь производстванть туртов.
Заводсонть улить лабораторият лекарствань средстватнень арсеманть-тееманть туртов. Те лезды ливтемс рынкав эрямонть туртов пек эрявикс препараттнэнь, истя жо киртямс производствань питненть.
Стратегической сессиянть лувсо кортасть, кода важоди куратортнэнь институтось ды мезенть эряви вадрялгавтомс. Михаил Мишустин ледстинзе прявт лувтнень, конатнень лангс нежедить куратортнэ проекттнэнь топавтомсто. Юткстост прявттнэ – регионтнэс инвестициятнень ламолгавтомась, важодемань таркатнень ламолгавтомась, эрицятнень прявт доходтнэнь кастомась ды истя седе тов.