Павел Давыдов, профессиональной военноесь, васенце читнестэ саезь ульнесь специальной военной операциясонть. Казезь ламо боевой наградатнесэ, сынст ютксо Мужествань орден, Суворовонь медаль. Тонавтыцятне ды ве классо тонавтницятне кирдить мельсэ сонзэ кода чевте седей ды мелень явиця ломаненть – сон парсте тонавтнесь, эзь макст покордамс сеттнень, кие седе лавшоль, ульнесь школанть эрямосо. Павел прядызе Рязанень гвардейской высшей воздушно-десантной училищанть, военной службань 10 иетнень перть кармась гвардейской батальононь командирэкс майоронь званиясо, ульнесь Сириясо боевой тевдеематнесэ.
«Течи минь пурнавинек тей, штобу топавтомс иневанькс долгонть минек земляконть икеле – пингеде пингес ванстомс сонзэ коряс ледстнематнень се таркасонть, косо сон кассь-тонавтовсь кода ломань, кода цера, топавтано тень тетянзо-аванзо, малавиксэнзэ, весень пингстэ, кие сонзэ содылизе, кинень сон питней. Сонзэ коряс валдо ледстнематне кадовост тынк седейтнес свалшкас», – мерсь, митингенть панжомсто, Мордовиянь Прявтось.
Артём Здунов евтась сюкпря Павелэнь тетянстэнзэ-аванстэнзэ, Сергей Вильдановичнень ды Ирина Васильевнанень, вадря церанть, алкуксонь героенть трямонзо-кастоманзо кисэ. «Минь аштетяно каштанчисэ минек земляконть кувалма», – тешкстызе республикань руководителесь.
Митингсэнть кортасть Саранскоень ды Мордовиянь митрополитэсь Зиновий, истя жо Павелэнь лелязо – ФСИН-нь внутренней службань полковникесь Игорь Давыдов. «Мон свал содылинь, сонзэ эйстэ касы алкуксонь ломань. Ванстодо сеть цератнеде ледстнематнень, кить ванстыть минек Чачома масторонть», – мерсь сон, кадеттнэнень ды юнармеецтнэнень пшкадемстэ. Воинэнть ледстизь чатьмонемань минутасо.
Лицеень актовой залсонть панжозель «Героень Партась», сон путови се классонтень, косо тонавтнесь Павел Давыдов, сонзэ экшсэ кармить аштеме сехте вадря тонавтницятне.
«Россиясь эри, секс мекс улить истят геройть», – тешкстызе Артём Здунов. Республикань руководителесь пачтясь маштовозь воинэнть тетянстэнзэ-аванстэнзэ государственной покш награда Россиянь Федерациянь Президентэнть Владимир Путинэнь пельде - «За заслуги перед Отечеством» IV степенень орден торо марто (героенть куломадонзо мейле).
Павел Давыдовонь марто вейсэ тонавтницятне невтизь видеороликенть, конасонть евтнесть, кодамокс сынь кирдить мельсэст эсь ялганть. Актовой залсо ваныцятнень эзть кирдеве сельведест.
«Героень Партанть» панжомсто истя жо кортась боевой тевдеематнень ветеранось, «Защитники Отечества» Фондонь социальной координаторось Иван Волков. «Ней миненек эряви кирдевемс вейсэ, мокшнань лепштязь. Кода Ине Отечественной войнань ветерантнэнь эйкакштненень-нуцькатненень», – мерсь сон.
Мордовия Республикань Прявтонь пресс-службась