Мордовиясо эйзюрковонь 18-це чистэ ютавтовсть мероприятият, конат алтазельть историянь те покш тевентень кемень иетнень топодемантень. Саранскойсэ Эень дворецэнть маласо площадьсэнть ютавтовсь кенярксчинь концерт, конась алтазель Крыменть ды Севастополенть Россиянть марто вейсэндявомань чинтень. Концертэнтень састь эрьва кодат отраслятнень важодемань коллективтнень, общественной организациятнень, студенчествань представительтне – весемезэ малав 5 тежат ломанть. Весень вейсэндясь Чачома масторонтень певтеме вечкемась.
«Вечкевикс землякт! Течи минь пурнавинек тей, штобу кирдемс минек Россиянть. 10 иеть ютасть, кода Крымесь ды Севастополесь велявтсть тиринь енксов. Зяро иеть минь бороцинек неть таркатнень кисэ! Зяро эрямот путсть минек земляктне, минек соотечественниктне. Ледстинк историянть, Ине Отечественной войнанть. Ней Новороссия, Донбасс – неть таркатнень кисэяк минь ламо верь валынек. Зяро паро минь тосо теинек, зяро кеж минь тосо ней изнятано! Минь пурнавинек тей, штобу кирдемс минек Президентэнть. Вечкевикс землякт, евтан тенк покш сюкпря кочкамотнесэ кирдеманть кисэ. Минь вечкема ды седей лембе марто явтано мель минек масторонтень, кирдтяно минек боецтнэнь, конат ней аштить окоптнесэ, кирдтяно сынст семиятнень. Те истя жо минек вейсэндявомась. Течи ушодовсь Ине постось. Ине постонть шкасто минь свал бороцятано минек пелематнень каршо, эсь лавшочитнень каршо ды свал изнятано. Ды нейгак Россиясь изни. Россиянть кисэ! Владимир Владимирович Путинэнь кисэ, минек Президентэнть кисэ!» – мерсь Мордовиянь руководителесь.
«Народный фронт «За Россию» Весероссиянь общественной движениянь региононь отделениянь региононь штабонь сопредседателесь Людмила Нарбекова евтась поздоровт весе пурнавозетненень юбилеень чинть кувалма ды тердинзе рузонь поэтэнть ды Сиянь пингень артыцянть Максимилиан Волошинэнь выставкав – сон панжови эйзюрковонь 19-це чистэ Эрьзянь музейсэ.
Боевой тевдеематнень ветеранось, специальной военной операциянь участникесь Иван Михеев евтась сюкпря земляктненень минек боецтнэнь кирдемаст кисэ. «Изнямось карми минек!» – мерсь сон.
Эрзянь ды мокшонь раськень регионъютконь общественной организациянь председателесь Юрий Мишанин тешкстызе: Мордовиянть ды Крыменть сюлмотне кемекставить. «Эрьва ие тосо ютавтови «Шумбрат» фестивалесь. Ды течи мон кортан: «Шумбрат, Крым! Шумбрат, Россия! Шумбрат, Президент! Шумбрат, Мордовия!»
Мордовия Республикань Прявтонь пресс-службась