Эште вейке фестиваленть лувсо регионов састь авторт ды мельтнень-арсематнень максыцят, музыкантт, поэтт, специальной военной операциянь участникть ды общественной деятельть. Фестивалень прявтось, ламо эйкакшонь авась, режиссерось-документалистэсь, поэтэсь Олеся Шигина тешкстызе, умок вечкевсь тензэ Мордовиясь, секс мекс тесэ улить рузонь культурань, Пазонтень, Россиянь государствантень ды сонзэ воинтнэнень кемемань шаштыцят.
«Течи тей пурнавсть эрьва кодат ломанть. Ансяк весе минь – вейке народ. Миненек эряви изнямс! Ансяк вейсэндявозь вейке мокшнас, минь изнясынек те кежей виенть, конась каявсь лангозонок: кулянь паксясонть сынь бороцить видечинть каршо, историянсесэнть – минек койтнень-кирдатнень каршо, промышленностень – яжить минек науканть, эсь прянтень кемеманть, – мерсь Олеся Шигина. - Кинось вейсэнди искусствань весе енксстнэнь – те сехте виев оружиятнень ютксто вейкесь. Бути минь изнятано тылсэ, изнятано фронтсояк».
Мордовиянь Прявтось Артём Здунов евтась сюкпря «Кино на службе Отечеству» фестивалень весе командантень: «Омбоцеде минь ютавтано фестиваленть республикасонть, те покш честь ды покш ответственность. Пек питней, сон ютавтови Ине Изнямонтень 80 иетнень топодемань иестэнть! Минек тонавтсть, историянть сермадыть изницятне. Ансяк зярс апак изняво ятось сермады эсензэ антилетописенть, бажи манчемс историянть. 50-100 иетнень ютазь весе кармить нежедеме сень лангс, мезе минь кадтано эсенек мельга. Секскак «Кино на службе Отечеству» проектэнь важодемась пек эрявикс! Сюкпря тенк сонзэ кисэ! Минь воеватано идеологической фронтсонть!»
«Кино на службе Отечеству» фестивалентень ютавтомань шканть перть совасть ламо енкст: музыка, поэзия, изобразительной искусства, режиссура. Фестивалень командантень совицясь Роман Жиган евтась сюкпря весе анокстыцятненень-ютавтыцятненень региононь пельксэнь ветямонть кисэ: «Мордовиясо редяви вечкема!» Моразель «Мирное небо над землей» морось. Церемониянть шкасто истя жо невтезель «Из ЗК в ЧВК» фильмань тизерэсь – икеле пекстазетнеде, конат стясть Отечествань ванстомо.
Россиянь Общественной палатантень совицясь, суверенитетэнь, патриотической проекттнэнь ды ветерантнэнь кирдемань кевкстематнень коряс комиссиянь председателесь Владимир Рогов тешкстызе: «СВО-нь васенце чистэнть саезь, куш мон аволь военной, минек рузонь олякстомтыця армиянть марто мон совинь Запорожской тиринь моданть лангс. Минь рузтнэ – свал ульнинек ды аштетяно видечинть кисэ. Зярс минь вейсэ – минь а изнявтано. Мордовиясо лиятнень енов а молиця мода, лиятнень енов а молицят ломанть – тынк весемесь алкуксокс! Сюкпря тенк седейшкавань важодеманть кисэ».
Владимир Рогов казсь «Шагнувшие в бессмертие» общественной медальть маштовозь боецэнть Илья Дьяковонь аванстэнзэ Вера Петровнанень ды маштовозь боецэнть Виктор Любаевень семиянстэнзэ – Надежда нинстэнзэ ды Иван церанстнэнзэ.
«Отцы России» вейсэндявксонь региононь отделениянь председателесь Максим Захаров казсь «Отец солдата» общественной тешкстамонь награда ламо эйкакшонь тетянтень Александр Афониннэнь – кавто церанзо невтсть отвага ды а пелемачи специальной военной операциянь тевтнень топавтоманть пингстэ ды поладыть служамо Отечествантень. «Отец солдата» наградась истя жо максозь Александр Швецовнень ды Евгений Рыжаковнень, сынст цераст ней СВО-сот.
Фестивалень командась усксь Мордовияв сеске зярыя документальной лентат специальной военной операциянь геройтнеде, простой ломантнеде, конат неить эсь тевенть Чачома масторонь ванстомасо, видечинь вельмевтемасо ды историянь ледстнематнень ванстомасо. Весе неть киноважодематне кадовить республикасонть невтеманть туртов, истя жо тонавтомань учреждениятнесэ. Теде башка, фестивалень важодеманть лувсо Мордовиясо ютавтовить эште колмо кинолентатнень съемкатне.
Мордовия Республикань Прявтонь Пресс-службась