Те енксонь важодицятненень поздоровт евтась Мордовиянь Прявтось Артём Здунов. Сон тешкстызе: меельце иетнестэ республикань жилищно-коммунальной хозяйствасонть редявить вадря енов полавтомат. «Минь ультяно эрямо таркатнень фондонь, инженерэнь инфраструктурань объекттнэнь одкстомтомань, территориятнень вадрялгавтомань коряс весе программатнесэ. Икеле минек ламо пелькстамот, конатнесэ минь карматано примамо участия. Правительствантень эряви саемс тесэ ероков позиция, – мерсь Артём Здунов. – Ютазь иень невтевкстнэнь коряс неть тевтнень топавтомс явозь 3 млрд целковойть».
Мордовиянь Прявтось тешкстызе ««Чистая вода» программанть. «Сон вити ведень пачтямонь ламо иень стакачитнень, сынст эйстэ ламо. Миненек эряви витемс Саранскоень сеттнень, минь домкасто ваннотано те кевкстеманть, аламо-аламо карматано весементь витеме. Мелят минь одкстомтынек водозаборонть Ковылкина ошсо, строинек ведень пачтямонь сеть Кемлясо, ведень ванськавтомань станция Орданьбуесэ. Чаунзасо ды Лямбирьсэ витинек тевтнень. Тедеде эряви витемс тевтнень ведень пачтямонть коряс Краснослободскойсэ ды эскелямс седе тов», – мерсь Артём Здунов.
Эрявикс ошонь вадря средань теемань программась. Мелят вадрялгавтозь 19 кудотнень перька таркат ды 9 общественной таркат. 2030 иенть видьс эряви вадрялгавтомс весе кудотнень перька таркатнень, эрямонь весе пункттнэсэ улест общественной таркат, косо мереви оймсемс, ютамс.
Мелят республикасонть топавтозь Саранскойсэ лембень пачтямонь систематнень одкстомтомань коряс кавто покш проектт, вейсэнь питнесэ 600 миллионт целковойтнеде седе ламо.
Территориятнень виевгавтомань фондонть лезксэнзэ вельде тедеде Саранскойсэ витневить 3,5 вайгельбеть канализациянь сеть ды коллектор.
Истя жо тедеде педе-пев витневить 237 ламо квартирань кудот вейсэнь питнесэ 800 млн целковойтнеде седе ламо.
Эрицятнень бытовой обслуживаниянь ды ЖКХ-нь важодицятненень поздоровт истя жо евтасть Мордовиянь Госсобраниянь Председателесь Владимир Чибиркин, республикань Правительствань Председатель Дмитрий Поздняков, МР-нь Энергетикань ды ЖКХ-нь министрась Александр Голянин.
Кенярксчинь промкссонть явшевсть государственной ды ведомственной наградат.
«Сюкпря Артём Алексеевич Здуновнень награданть кисэ, конань монень максызь, – мерсь Татьяна Камушкина, Орданьбуе енксонь «Тургеневожилкомхоз» МП-нь жилищно-эксплуатационной участкань прявтось. – ЖКХ-нь системасонть важодян 30 иетнеде седе ламо. Минек важодемасонть сехте прявтось – марямс эрицятнень пшкадемаст, каземс тенст лембе, шкастонзо витемс весе асатыкстнэнь, кияк илязо покордаво минек лангс. Монень пек мельспаро, монь важодемам тешкстызь, сюкпря!»
Мордовия Республикань Прявтонь Пресс-службась