Шумбракстнемань валт форумонтень пурнавозетненень кучсь Россиянь Президентэсь Владимир Путин. «Сядот иетнень перть минек ламо раськень масторось панжадоль исламонь мастортнэнь марто келей вейсэнь тевдееманть туртов. Ды течи, апак вано раськеютконь стака тевтнень лангс, минь поладтано келейгавтомо экономикань, наукань, тонавтомань, гуманитарной ды регионъютконь сюлмотнень.
Форумонть лувсо тыненк эряви кортамс эрьва кодат енкстнэсэ, истя жо технологической, минек сюлмотнень седе тов кемекстамонь лувтнень. Цифровой финансовой системань виевгавтомань коряс вейсэнь важодемантень ули алтазь «Россия – Исламский мир» стратегической неемань группань промксось, тосо кармить улеме Исламонь мастортнэнь марто вейсэнь тевдеемань организациянь представительтне.
Тедеде минь тешкстатано Ине Отечественной войнасо Изнямонь 80 иетнень. Те редявикс тевентень пшкадемась муи тарка форумонь деловой ды культурань программасонть. Миненек эряви ванстомс ледстнематнень историянь уроктнеде, нацизманть, расизманть, колониализманть каршо бороцямосонть тетятнень-покштятнень смелчинть ды чарькодеманть коряс. Ды минек читнестэ ансяк вейсэ минь топавтсынек масторлангонь весе сообществань виевгавтоманть, лезэвстэ аштетяно каршо сэтьмечинь неень шкань истят тандавкстнэнень, кода терроризмась, экстремизмась, локальной аладямотнень эскалациясь», – кортави пшкадемасонть.
Мордовия Республиканть пельде форумсонть важодить властень органтнэнь, промышленностень ды АПК-нь представительтне, башка предпринимательтне.
Мордовия Республикань Прявтонь Пресс-службась