Мордовиянь Экономикань, микшнемань ды предпринимательствань министрась Алексей Грибанов пачтясь, кода республикасонть топавтовить федеральной инициативатне, Россиянь Президентэнть кармавтоманзо, конат токшить экономикань ды социальной енкстнэнь.
«Кредитэнь каникулатнень» коряс банктнень региононь отделениятнес пшкадсть вишка ды средней предпринимательствань 198 субъектт (малав 817 млн целковойтнень коряс). Мордовиянь предпринимательствантень лездамонь фондось макссь «кредитэнь каникулат» МСП-нь 71 субъектэнтень 123 млн целковойтнес. Ансяк ютазь недлястонть те кевкстеманть коряс пшкадсть 23 субъектт.
Льготань кредитованиянь весе программатнень коряс региононь вишка предприятиятнень пельде састь 150 яволявтомат (1,5 млрд целковойтнес).
Алексей Грибанов пачтясь, Россиянь Банкось чадыковонь 11-це чистэнть саезь ключевой ставканть валгстызе 17 проценттс, МР-нь Предпринимательствантень лездамонь фондось истя жо ванносы фиксированной процентэнь ставкатнень валгстомань кевкстеманть.
АПК-нть коряс арсеви явомс кредитт: 5 млрд целковойтнеде аволь седе ламо, ставкась - 10% иезэнзэ. Россиянь Правительствань резервань фондстонть аграрийтнень туртов арсеви явомс 26 млрд ламо целковойть. Неть ярмактнень получамонть туртов прявт вешемась – 90% аволь седе аламо важодицятнень ванстомась. Промышленной предприятиятне истя жо эрязасто кучить яволявтомат льготань ставкатнень коряс заемтнэнь получамонть туртов.
Алексей Грибанов тешкстызе, республикасонть ветяви 52 товартнэнь коряс розницань питнетнень автоматизированной ванномась. Товартнэнь асатома арась.
Чадыковонь 16-це чистэ Саранскойсэ ютавтовить ярмункат.
Мордовиянь Финансонь министрань тевтнень топавтыцясь Сергей Тюркин тешкстынзе РФ-нь Президентэнть кармавтоманзо коряс (регионтнэнень социально-экономической лезксэнь явомань тевтнеде промксонь итогтнень коряс), Россиянь Правительствасо кемекстазь господдержкань коряс важодемань прявт енкстнэнь.
Мордовиянь Прявтось тешкстызе, региононть тень кувалма улить од возможностензэ, совавтовить полавтомат Мордовиянь социально-экономической виевгавтомань программантень.
Мордовиянь Госкомимуществань председателесь Андрей Мищенко евтнесь санкциятнень лувсо республикасонть государственной ули-паронь сиведицятненень лездамонь тевтнеде.
Сон тешкстызе, ней анокстави законопроект, конань коряс импортонь полавтыця товартнэнь нолдыцятненень модань участкатне максовить арендас – 1 целковойс иезэнзэ. Те токшесы велень хозяйстванть, обрабатывающей производстванть, ярсамопелень промышленностенть ды лекарстватнень производстванть.
Тень кувалма Артём Здунов тешкстызе, те токшесы арендань ды налогонь шкастонзо пандыцятнень.
«Минек улить зярыя предприятият, конатненень те лезксэсь а максови, секс мекс а пандыть обязательной платежтнэнь – льготат тенст а эрявить! А вана региононтень пек эрявить ярмактне, конатнень сыненст эряви пандомс бюджетс. Саранскойсэ тень кувалма ютавтозь модань участкатнень, недвижимостень объекттнэнь ванномась. Маласо шкастонть пачтядо тевтнеде», – пшкадсь региононь Прявтось Саранск ошонь округонь руководителентень.
Промкссонть истя жо кортасть трудонь ды занятостень рынкасонть молиця тевтнеде, те енкссонть господдержкань тевтнень топавтомадост.
Мордовия Республикань Прявтонь пресс-службась