Даволковонь 5-це чистэ Мордовиянь Правительствань Председателесь Владимир Сушков Московсо ютавтсь важодемань вастовомат, конат алтазельть минек республикань социально-экономической виевгавтомантень. Россиянь Просвещениянь министрань полавтыцятнень Виктор Басюк ды Андрей Николаев марто вастовомасонть Владимир Сушков ёвтнесь Мордовиясо 2019 иестэ «Образование» нацпректэнь топавтомадонть. Целевой весе невтевкстнэ топавтозь, явозь ярмактне нолдазь тевс целанек. Панжозь од школа Краснослободскойсэ, республикань районтнэсэ теезь «Точка роста» тонавтомань куншкакурот, важоди «Кванториум» эйкакшонь технопаркось. Кортавсь Саранскойсэ специальной коррекционной общеобразовательной школань-интернатонь теемань кевкстемась.
Ванкшновсть Россиянь Президентэнть Федеральной Собраниянтень Кучомань топавтоманть лувсо школань ярсамопелень анокстамонь кевкстематне. Владимир Сушков тешкстызе, Мордовиясо 2020 иень таштамковонь 1-це чистэнть саезь 1-4-це классо тонавтництяне кармить андовомо питневтеме.
Россиянь Культурань министрань полавтыцянть Николай Овсиенко марто вастовомасонть кортамось мольсь профилень нацпроектсэнть Мордовиянть улемадонзо ды культуранть коряс Президентэнть кармавтоманзо топавтомадо. Тешкстасынек, мелят педе пев витнезь Покш Игнатовасо Культурань кудось, Някань государственной театрась, панжозь виртуальной концертэнь зал Ковылкинасо, мобильной библиотекат ды кинозалт Мордовиянь районтнэсэ.
2020 иестэ арсеви педе пев витнемс культурань учрежденият, рамамс музыкань инструментт.