Медьковонь 22-це чистэ Мордовия Республикань Прявтонь тевтнень топавтыцясь Артём Здунов видеосвязь вельде ютавтсь коронавирусонь орманть а нолдамга оперативной штабонь промкс. Кортавсть эпидемиологической тевтне, кода моли COVID-19 ормадонть прививкань путомась, кода важоди региононь здравоохранениясь, кода кирдевить санитарно-эпидемиологической вешематне.
Региононь прявтось тешкстызе, Мордовиясо коронавирусонь инфекциянть марто тевтне талновтыть: эрьва чи 60-де ламо од сэредицят. МР-нь Прявтонь тевтнень топавтыцясь пачтясь, од штаммось педси натой од ломантнес. Ковидэнь госпиталень реанимациянь отделениятнесэ сэредицятнень эйстэ 40% - иест 18 саезь 59 иеть. Ламот эйстэст важодить покш коллективсэ. Артём Здунов эштё весть мерсь явомс мель вакцинациянть шкастонзо ютавтомантень.
«Неть покш предприятиясо важодицятнень улить семияст, тосояк лисить зыянов тевть. Теемс прививка минь киньгак вийсэ а кармавттано. А вана ёвтнеме берянь тевтнеде эряви. 104 ломантнеде, конат ней аштить реанимациясо, прививка кияк эзь теекшне», - мерсь Артём Алексеевич.
МР-нь вице-премьерэнь тевтнень топавтыцясь Галина Лотванова ёвтнесь, пек ламонь путнить больницяв. «Коронавирусонь од орма» диагнозонть марто больницяв недлязонзо састь эштё 660 ломанть.
«МР-нь Минздравонтень ютазь недлясто савсь панжомс эштё 85 таркат. Торбеевань ЦРБ-сь ютась ковидэнь важодемань лувс, весемезэ истя важодить здравоохранениянь 9 учрежденият. Улить 1345 таркат, сынст ютксо 1111 пешксе. Чаво 17,5%», - ёвтнесь цётамотнеде Галина Лотванова.
МР-нь здравоохранениянь министрань тевтнень топавтыцясь пачтясь, медьковонь 22-це чинтень вакцинань васенце компонентэсь путозь 230281 ломаннень, те малав 30%. Сон тешкстызе, «Спутник V» вакцинась неень шкане сехте пек вансты уликс штаммтнеде. Весе ломантнень вакцинациясь лезды аволь ансяк лоткавтомс орманть, сон а нолдасы лия мутациятнень.
«Вирусонь мутациятне лисить сестэ, зярдо кодамояк региононь потсо улить сонзэ туртов паро условият. Кода ансяк минь лоткавтсынек вирусонть педямонзо ломаньстэ ломаньс, сестэ лоткить лисеме од штаммтнеяк», - ёвтнесь Олег Маркин.
Оперативной штабонь промкссо кортасть промышленной, перерабатывающей предприятиятнесэ ды микшнемань федеральной покш сеттнесэ вакцинациянть беряньстэ молемадо. Ламот каить чумо важодемань аволь паро графикенть лангс. Ответственной министратненень кармавтозь ютавтомс компаниянь прявттнэнь марто вастовомат ды кочкамс чить ютамс вакцинация мобильной пунктсо.
Мордовия Республикань Прявтонь Пресс-службась