Чадыковонь 7-це чистэ Мордовиянь Прявтонь тевтнень топавтыцясь Артём Здунов ютавтсь республикасонть правопорядоконь топавтоманть коряс координационной промкс, тосо ульнесть виень структуратнень, министерстватнень ды надзоронь ведомстватнень прявттнэ.
Промксонть прявт кевкстемакс кармась РФ-нь законодательстванть коряс уроз-эйкакштненень эрямо таркатнень максомань пингстэ коламотнень редямонь коряс важодемась. Течи республикасонть очередьсэ аштить 1043 ломанть. Сыненст квартиратнень максоманть туртов Мордовиянтень эрявить малав 1 миллиард целковойть. Прокурортнэ мукшныть коламот те ёнкссонтькак. Истя, муниципальной вейке районсонть редязель, местной властне рамасть квартира 1 млн 300 тёжат целковойде, алкуксонь питнезэ жо 650 тёжат целковойде аволь седе ламо. Должностной лицятнень тевдеемантень максови правовой питне.
Мордовиянь Прявтонь тевтнень топавтыцясь тешкстызе, неть тевтнесэ кодаткак жалямот иляст уле. «Визьксчамантень тердеме киньгак а карматанок. Бути те преступлениясь ульнесь, эряви наказамс закононь казямочинть коряс, - яволявтсь Артём Алексеевич. – Неть ломантнень мезеяк иневаньксост арась. Аволь ламо ярмактнесэ эштё истя сынст ютавтыть».
Промкссонть кортасть правань коламотнеде, истя жо коррупциянь, конат редязь национальной ды федеральной проекттнэнь топавтомсто. Кармавтыцятнень ды подрядчиктнень тевдеемасо ансяк республикань прокуратурась редясь законодательствань 400 ламо коламот. Дисциплинарной ответственностес тердезь 100 ламо должностной лицят, 68 – административнойс, ушодозь 9 уголовной тевть.
Мордовия Республикань Прявтонть пресс-службась