Мордовиянь Прявтонь тевтнень топавтыцясь вастневсь Олимпийской ды Паралимпийской налксематнень участниктнень марто

Мордовиянь Прявтонь тевтнень топавтыцясь вастневсь Олимпийской ды Паралимпийской налксематнень участниктнень марто

Таштамковонь 16-це чистэ Мордовия Республикань Прявтонь тевтнень топавтыцясь Артём Здунов вастневсь национальной сборнойтнес совицятнень, Япониясо ютавтозь Олимпийской ды Паралимпийской кизэнь налксематнень участниктнень марто.

Россиянь Олимпийской сборной командантень Мордовиянть пельде совасть спортсментт спортонь колмо видтнэнь коряс. Артём Сурков ды Сергей Емелин невтсть греко-римской бороцямонть. Александр Катышев, Евгений Клещенко ды Наталья Суворова бороцясть медальтнень кисэ ВМХ-велоспортсонть. Эльвира Хасанова ульнесь 20 вайгельбес спортонь якамосонть.

Теде башка, Евгений Швецов совась Паралимпийской сборнойс. Спортсменэсь чийсь 400 метрат.

Пелькстамотнень коряс Мордовиянь атлеттнэ путсть Россиянь паргинентень кавто медальть. Сергей Емелинэнь - бронза. Евгений Швецовонь - сия.

Ледстясынек, Россиянь Президентэсь Владимир Путин макссь покш питне минек спортсментнэнень, Сергей Емелинэнь казизе «За заслуги перед Отечеством» Орденэнь II степенень медальсэ, Евгений Швецовонь - «За заслуги перед Отечеством» Орденэнь I степенень медальсэ.

Артём Здунов тешкстызе, Мордовиясь эсь тевензэ топавтынзе вадрясто. "Сюкпря тыненк ды тонавтыцякс туртов тевентень истямо мелень явоманть кисэ. Апак кавтолдо, Олимпийской налксематне - тынк эрямосо прявт тевтнестэ вейкесь. ПФО-нть минь саинек колмоце тарка национальной сборнойс совиця спортсментнэнь коряс, мелень коряс сынь ламолгадсть колмоце пельксэс. Эряви ванстомс вийтнень, од стартось уш колмо иень ютазь", - мерсь Мордовиянь Прявтонь тевтнень топавтыцясь.

Региононь руководителесь тешкстызе, анокстамонть эряви ушодомс нейке. Тень коряс кортась спортсментнэнь ды тренертнэнь марто.

Артём Здуновнень пачтясть, Россиянь Минспортсонть прядовить кортамотне Саранскойсэ ВМХ-велосипедисттнэнь туртов суперкроссонь трассанть строямодонть. Те карми Россиясо 8 метрань сэрьсэ вейкине пандо. Зярс минек спортсментнэнень анокстамо сави ардтнемс лия мастортнэс. Мордовиясь карми ВМХ-велоспортонь федеральной центракс.

МР-нь Прявтонь тевтнень топавтыцянтень истя жо пшкадсть бороцицятне. Сынст валост коряс, греко-римской бороцицятнень изнявксост лангс ванозь, эрьва иестэ секциятнес пряс сермадстыть ламо эйкакшт. Улиця вийтне а сатыть. Мордовиянь спортонь ды од ломанень политикань министрань тевтнень топавтыцясь Александр Савилов пачтясь, РФ-нь Правительствас пачтязь проектэсь Саранскойсэ Единоборствань куншкакуронть теемадо. Сы иестэнть ушодыть анокстамо ПСД-нть. Артём Алексеевич кармавтсь эрязкавтомс те кевкстемань витеманть.

Мордовия Республикань Прявтонь пресс-службась