Мордовиянь Прявтонь тевтнень топавтыцясь ютавтсь градостроительной советэнь промкс

Мордовиянь Прявтонь тевтнень топавтыцясь ютавтсь градостроительной советэнь промкс

Медьковонь 17-це чистэ Республикань Кудосо Мордовиянь Прявтонь тевтнень топавтыцясь Артём Здунов ветясь МР-нь градостроительной советэнь омбоце промкс. Мордовия Республикань градостроительной советэсь пурназь республикань Прявтонь тевтнень топавтыцянть мелензэ коряс, сонзэ прявт вешемась – максомс питне градостроительной арсевкстнэнь туртов, анокстамс республикань архитектурань ды ошонь строямонь-стявтомань коряс рекомендацият. Советэнь составс совасть учёнойть, архитекторт, властень органонь ветицятне ды общественниктне. 

Промкссонть кортызь Саранскоень кавто од микрорайонтнэнь стявтомань архитектурно-планировочной ёнкстнэнь, сынь кармить Волгоградская куронть ды Кочкурова велев молиця килангонть ютксо (Тавла леенть вакссо). Котамось мольсь 6-це ды 3-це микрорайонтнэде.

6-це микрорайонось стявтови стадиононть ды Инсар леенть вакссо. Кода ёвтнесть проектировщиктне, арсеви теемс ялго якамонь бульвар, сон вейсэндясы Инсар лейчиренть поладоманзо 2-це микрорайононь бульвартнэнь марто, те карми вейкине покш ялго якамонь тарка. Истя жо арсеви стявтомс эйдень кужо. Прявт мельтне – микрорайононь эрицятнень туртов паро эрямо, вадря социальной инфраструктура. Мордовиянь Прявтонь тевтнень топавтыцясь мерсь арсемс кода паролгавтомс Инсаронь лейчиренть ды леенть вакссо парконь тарканть.

3-це микрорайонсо (те Кочкуровав молиця киденть керш ёно таркась) арсеви стявтомс эйдень кужо, школась карми маласо – шабрасо аштиця 4-це микрорайонсо.

Градостроительной советэв пурнавозтне кемекстызь 6-це ды 3-це микрорайонтнэнь коряс арсевкстнэнь. Мельтне, конат ёвтазельть вейсэнь кортамосо, кармить саезь проектэнь меельце анокстамотнесэ.

Мордовия Республикань Прявтонь Пресс-службась