Понедельникстэ, даволковонь 10-це чистэ, Мордовиянь Прявтось Владимир Волков важодемань содавтома марто моли Чаунзань ды Отяжбуень ёнкстнэс. Чаунзасо ванносынзе вобозаборонь строямонть, конань панжомадо мейле посёлкань эрицятненень карми пачтявомо ванькс ведь. Теде башка, Чаунзасо региононь руководителесь моли «Красная шапочка» эйдень кужонь 70 таркас од корпусонтень, ванносынзе од группатнень, корты тетятнень-аватнень ды воспитательтнень марто. «Чамзинская» птицефабрикань Сабур-Мачкассонь площадкасонть Владимир Волковнень невтсызь бройлерэнь кастомань коряс од производстванть, иезэнзэ кастовить 18,5 тёжат тоннат нармунень сывель, теезь ветесядот важодемань од таркат.
Отяжбуень ёнкссо Мордовиянь Прявтось ванносынзе 320 кудонь строямс участканть, конась анокстазь Тетюши велесэ «Комплексное развитие сельских территорий» программанть коряс. 2019 иестэ участкатнес кармасть ветямо газ ды ведь, тедеде те важодемась ули поладозь ды прядозь. Теде башка, тей ветить электричества, строить ки. Тесэ арсеви строямс эйдень кужо, ФАП, стадион. Строямонть туртов модатне кармить максовомо АПК-нь важодицятненень «Комплексное развитие сельских территорий» госпрограмманть коряс, истя жо велень льготань ипотекань программанть коряс.
Теке жо чистэнть Владимир Волков Отяжбуесэ ванносы «Атяшевский» МПК-нь производствань вийтнень.
Мордовия Республикань Прявтонть пресс-службась