Мордовиянь Прявтось: «Андрей Кузнецов максызе сехте питнеенть минек тынк марто кисэ, минек олячинть кисэ, минек Россиянть кисэ»

Мордовиянь Прявтось: «Андрей Кузнецов максызе сехте питнеенть минек тынк марто кисэ, минек олячинть кисэ, минек Россиянть кисэ»

Специальной военной операциянь геройтне свалшкас кадовить минек ледстнематнес... Рузаевкасо даволковонь 2-це чистэ панжовсь мемориальной лаз Андрей Кузнецовонь ледстнемга – Мужествань колмо Ордентнэнь кавалерэнть, маштовсь Луганской народной республикасо воинской долгонь топавтомсто.

Эрьва шкась чачты эсензэ геройтнень. Сынст ютксто вейкекс ульнесь Андрей Сергеевич Кузнецов. Рузаевкасо чачозесь школань ды ПТУ-нь прядомадо мейле служась армиясо, прядызе Новосибирскоень военной институтонть ды Омскоень военной академиянть. Эйкакшпорасто саезь покш мель явсь спортонтень, сонензэ максозь армейской кедьсэ бороцямонь коряс Россиянь спортонь мастерэнь лемесь.

Эсь эрямонь смустекс сон ловсь Чачома масторонь мельтненень-арсематненень служамонть. Теде кортыть сонзэ наградатне: Андрей Сергеевич – Мужествань колмо Ордентнэнь кавалер, сонзэ послужной спискасонть «За заслуги перед Отечеством» 2-це степенень орденэсь,  «Участнику военной операции в Сирии» РФ-нь Оборонань министерствань медалесь,  «За отличие в военной службе» 2-це ды 3-це степенень медальтне.

Умарьковонь 13-це чистэ Андрей Сергеевич маштовсь СВО-со воинской долгонь топавтомсто. Ине тевензэ кисэ куломадонзо мейле казезь Мужествань Орденсэ.

«Аволь кувака од эрямонзо перть Андрей Сергеевич казезь ламо наградасо – коллегатнень ды руководстванть истямо тешкстамось кортыть сонзэ покш важодемадонзо эсензэ лангсо. Сон максызе сехте питнеенть минек тынк марто кисэ, минек олячинть кисэ, минек Россиянть кисэ – эсензэ эрямонть. Минь карматано кирдеме каштанчи ды ванстомо ледстнематнень Андрей Сергеевичень ине тевензэ кувалма. Свалшкань валдо ледстнема героентень!» – мерсь республикань руководителесь Артём Здунов.

Региононь руководителесь истя жо тешкстызе, спортонь турнирэнть, конась ютавтозь тедеде Рузаевкасо Андрей Кузнецовонь ледстнемга, эряви теемс эрьва иень, максомс сонензэ республиканскоень статусонть.

«Ломанесь сермадызе эсь прянзо ине масторонь ине историянтень, штобу минь тынк марто, сонзэ ине тевенть поладозь, улевелинек суверенноекс ды виевекс», – тешкстызе Саранскоень ды Мордовиянь митрополитэсь Зиновий.

«Андрей ульнесь эсь шкань героекс, маштсь арсемс аволь зяро эсь прядонть, зяро эсь Отечествань уцяскадонть. Сонзэ туртов сехте покш казнекс кармить минек тынк марто ледстнематне!» – мерсь Андрей Кузнецовонь роднязо-раськезэ Дарья Королева.

Мордовиянь Прявтось Артём Здунов ды военнослужащеенть авазо Лидия Владимировна панжизь мемориальной лазонть. Чатьмонемань минутасо ледстизь воинской долгонь топавтомсто весе маштовозетнень. Пурнавозетне путсть цецят ледстнемань лазонтень Андрей Кузнецовонь лемс.

Героенть малавиксэнзэ марто вейсэ Артём Здунов ульнесь классонть, косо тонавтнесь Андрей, ней тесэ сонзэ лемс путозь «Героень Парта», кабинетсэнть – школасо тонавтнемань шкань фотографиянзо. Героической тонавтницядонть евтнесь сонзэ классонь ветицясь Саркина Татьяна Викторовна: «Андреень туртов военной службась ульнесь сонзэ бажамокс ды весе эрямокс. Кирдян каштанчи, монь ульнесь истямо тонавтницям!» Лидия Владимировна мерсь: «Андрей эйкакшпорасто саезь кортась – карман разведчикекс! Истя лиськак...»

Мордовия Республикань Прявтонь пресс-службась