Аштемковонь 9-це чистэ Московсо важодемань коряс улемстэ Мордовиянь Прявтось Артём Здунов вастневсь Россиянь Спортонь министранть Михаил Дегтярёв марто. Кортамось мольсь Мордовиянь спортонь инфраструктуранть одкстомтомадо, истя жо федеральной проекттнэнь ды программатнень лувсо.
Кортамонть лувсо тешкстазель, Мордовиясь – масторонь спортонь регионтнэстэ вейкесь: эрьва ие тесэ ютавтовить регионъютконь, весероссиянь ды раськеютконь уровнянь 100 ламо пелькстамот. Ансяк те кизэсь тешкстазь сеске зярыя покш стартсо. Сынст ютксо - аволь умок ютавтозь спортонь якамонь коряс Россиянь чемпионатось, боксонь коряс Россиянь чемпионатось, Россиянь тонавтницятнень кизэнь XIII Спартакиадась, истя жо Весероссиянь Кизэнь X универсиадась. Сонзэ программасонть 17 дисциплинат, 14-тнесэ казнетне улить налксезь Мордовиясо. Республикасонть участниктнеде кармить 3 тёжадо ламо ломанть.
Артём Здунов тешкстызе, республикась важоди спортонь сферань виевгавтоманть коряс – 2022-2025 иетнестэ регионсонть строязь ды одкстомтозь 30 ламо спортонь объектт. Те, истя жо, ВМХ-трекесь (суперкроссонь трассась) ды кавто уровнянь фристайл-паркось, Саранскойсэ Универсальной залось, Орданьбуесэ «Дельфин» ды Отяжбуесэ «Каскад» укшномань бассейнатне, Ковылкинасо эень катокось, Покш Березниксэ панжадо типень физкультурань-шумбрачинь витемань комплексэсь ды Комсомольскойсэ ламо функциянь социально-спортивной куншкакурось. Ушодсь важодеме сурдлимпийской ды паралимпийской резервань Спортивно-адаптивной куншкакурось, конасонть тонавтнить 400 ламо спортсмент спортонь адаптивной видтнэнь коряс.
Покш мель явови массовой спортонь ды физкультурань виевгавтомантень, тень пингстэ башка мель эряви явомс семиянть лангс нежедиця лувонтень. Тень туртов теевить спортонь вишка ды универсальной площадкат ламо ломанень пурнавома таркатнесэ. Ветяви важодема бизнес-сообществанть мартояк предприятиятнесэ физкультурань-шумбрачинь витемань программатнень тевс нолдамонть, спартакиадатнесэ важодемань коллективтнень улеманть ды ГТО-нь комплексэнь максоманть коряс.
Ансяк мелят ГТО-нь нормативтнень максомасо примасть участия малав 11 тёжат ломанть. Мордовиянь 11 районтнэсэ ды прявтошсо теезь спортонь вишка площадкат (ГТО-нь тестированиянь куншкакурот) - весемезэ 30 истят объектт.
Тешкстазель, тедеде уш ушодовсь Рузаевкань енкссо эйкакшонь-од ломанень спортонь школань педе-пев витнемась, истя жо арсеви витнемс Спортонь ведень видтнэнь дворецэнь бассейнатнень.
Артём Здунов ды Михаил Дегтярёв кортасть региононь спортонь инфраструктурань одкстомтомань кевкстематнеде, конат вешить лезкс федеральной ведомстванть пельде. Истя, кортамось мольсь Саранскойсэ ды республикань районтнэсэ од объекттнэнь строямодост, Рузаевкасо бороцямонь залонть педе-пев витнемадонзо ды спортонь лия объекттнэнь одкстомтомадост.
Мордовия Республикань Прявтонь Пресс-службась