Мордовиянь Прявтось Артём Здунов якшамковонь 19-це чистэ Республикань Кудосонть ютавтсь вастовома Россиянь-Германиянь внешнеторговой палатань делегациянть марто. Кортавсть микшнемань-экономикань ды наукань-тонавтомань сфератнесэ вейсэнь важодемань енкстнэ.
Мордовиянь Прявтось тешкстызе региононь экономиканть туртов кавто ендонь отношениятнень виевгавтомань эрявиксчинть.
"Ютазь иень 9 ковтнень перть саезь аволь берянь темпа внешнеторговой оборотсонть - 11 млн ламо доллар - тешкстызе Артём Здунов. - Те аволь пек ламо, ансяк ули касомантень бажамо. Технической оборудованиясь, конась нолдазь Германиясо, путозь республикань ламот предприятиятнесэ. Те региононь весе промышленностенть технологической одкстомтомань прявт пелькс. Теде башка, минек прявт партнёртнэнь ютксо «Ремондис» компаниясь, конань марто минь важодтяно 10 иеде ламо. Компаниясь - республикасонть отходтнэнь марто важодемань региононь оператор. Ней минь анокстатано топавтомс вейсэнь од инвестпроектт".
Россиянь-Германиянь внешнеторговой палатань правлениянь председателесь Матиас Шепп тешкстызе, вейсэнь важодемань потенциалось пек виев.
"Меельце иетнестэ минь тешкстатано Россиясо немецень бизнесэнть рекордонь инвестицият, - тешкстызе сон. - Кеман, тынк республиканть марто сюлмотне кармить виензамо. Неян вейсэнь важодемань вадря возможностть велень хозяйствань продукциянь переработканть коряс - Мордовиянь предприятиятненень мереви покшолгавтомс экспортонть".
Промкссонть ульнесть республикань министратнень кабинетэнь членттнэ Правительствань Председателентень Владимир Сидоровонь прявтсо. Республикань Минсельхозонь ды Минпромонь представительтне тейсть эсест отраслятнень презентацият.
Мордовия Республикань Прявтонь пресс-службась