Аштемковонь 8-це чистэ Мордовиянь Прявтось Артём Здунов ютавтсь важодемань промкс ведень объекттнэсэ эйкакштнень укшномантень ды прянь ветямонтень тонавтомань кевкстематнень коряс. Тосо ульнесть министратнень кабинетэнтень совицятне.
Прявт пачтямо марто кортась Мордовия Республикань ВОСВОД-нь председателесь Валерий Евдокимов. Тешкстазель, республикасонть ванстови эйкакштнень ведь лангсо укшномань ды прянь ветямонь ёрокчитненень а сатышка анокстамонь стакачись. Те тевенть топавтомга прявтокс сон лови весе комплексной пелькстамотнес укшномань дисциплинатнень совавтоманть, истя жо ГТО-нь норматнень максомантень ды «Зарница 2.0» военно-патриотической налксемантень. Те лезды анокстамс од ломантнень пелькстамотнес ды тонавтомс укшномань ёрокчитнес.
«Тынк лезксэнк вельде, Артём Алексеевич, Образованиянь министерстванть, Спортонь министерстванть ды Од ломантнень тевест коряс госкомитетэнть марто вейсэ ютавтозельть 50 метрань дистанциясо укшномань коряс пелькстамот «Спартакиада допризывной молодежи РМ» программанть коряс, - тешкстызе Валерий Евдокимов. - Саранскойсэ, Рузаевкасо, Ковылкинасо, Краснослободскойсэ, Ицялонь енксонь Отяжеле ды Рождествено велетнесэ пелькстасть 14 иестэ саезь 17 иес малав 500 од ломанть. Пелькстамотне васенцеде ютасть истямо покшолмасо».
Мордовиянь образованиянь министрась Елена Солдатова пачтясь, укшномантень тонавтомась ветяви сеть эйдень кужотнесэ ды школатнесэ, косо улить бассейнат, те ветяви уроконь ды аволь уроконь тевдееманть лувсо. Эйдень кужотнесэ занятиятне ютавтовить ниле иестэ саезь эйкакштнень марто, школатнесэ тенень алтазь таргозонзо физкультурань колмо уроктнестэ вейкесь. Тонавтоманть топавтыть школатнесэ 26 инструкторт ды эйдень кужотнесэ 10-тне - весе сынь ютасть тонавтомань башка программа ды сынст ули «плаврук» квалификацияст.
Кортамодонть мейле Мордовиянь Прявтось кармавтсь Правительствантень анокстамс аравтлув ведень объекттнэнь вешематненень ладямонь тееманть коряс, конатнень мереви нолдамс тевс ламо ломань марто экшелямонть туртов. Истя жо эряви ютавтомс таркатнень покш инвентаризация укшномантень тонавтоманть туртов ды инструктортнэнень. Башка мель явозель «Старт» стадиононь комплексэнь одкстомтомань коряс важодематненень.
«Тонавтнемань ютазь иенть перть укшномантень тонавтомань программанть ютызь малав 8 тёжат – те а саты! - меельцекс мерсь Артём Здунов. - Карматано нолдамо тевс эрявикс весе инфраструктуранть. Совавтсынек укшноманть пелькстамотнень программантень, 2027 иестэ «Зарницань» весе пелькстнэсэ укшномась карми эрявомо. Списканть карматано келейгавтомо! Анокстатано эйкакштнень пек эрявикс ёрокчинтень – укшномантень тонавтомань коряс мероприятиятнень аравтлув».
Мордовия Республикань Прявтонь Пресс-службась