Мордовиянь Прявтось Артём Здунов эйзюрковонь 5-це чистэ Московсо «Россия сегодня» Раськеютконь мультимедийной пресс-центрасонть ульнесь кругловой стольсэнть теманть коряс: «Демография России 2026: вызовы и будущие стратегии».
Кода тешкстызе ВЦИОМ-нь Аналитической куншкакуронь прявтось, РФ-нь Правительстванть юрсо Финансонь университетэнь социальной наукань ды массовой коммуникациянь факультетэнь деканось Валерий Фёдоров, неень шкане весе масторлангось печти демографиянь кризис. Россиясо ламо эйкакшонь семиятненень лездамонь государствань политикась максы цётавкст, ансяк чачтоматне зярс поладыть киртявомо. Кодат тердемат течи аштить обществанть икеле, кодат кекшезь аволь финансонь резерват улить чачтоманть кастомга, кодат тевтне невтизь эсь пряст сехте лезэвстэ – теде кортасть эксперттнэ.
Тешкстазель, масторонь 26 регионтнэсэ, истя жо Мордовия Республикасо, редяви вадря динамика чачтоманть коряс. Республикань Прявтось, Госсоветэнь «Семья» ёнксонть коряс комиссиянь председателесь Артём Здунов ёвтась сюкпря ВЦИОМ-нтень кругловой стольс тердеманть кисэ ды ёвтнесь лезэв практикатнеде, конат лездыть витемс демографиянь стака тевтнень.
Республикань руководителесь тешкстызе: ломантневтеме кодамояк экономика а карми, секскак эряви комплексной ёнкс, ков совавтови социальной вадря инфраструктурань теемань коряс важодемась. Нацпроекттнэ, конатнень яволявтынзе Россиянь Президентэсь, максыть лезэ. «Невтемакс, минь ней тешкстатано школатнень ды эйдень кужотнень педе-пев витнемань покшолматнень коряс историянь максимум – истямо арасель натой советэнь шкастояк!» - тешкстызе Артём Здунов.
Эряви эйкакш марто семиятненень социальной лезксэнь тевтнень явомаськак – Мордовиясо эйстэст ниленьгеменде ламо. Республикасонть эрьва эйкакшонть чачомсто семиянтень каяви ипотекань кредитэнь пельксэсь, нилеце эйкакшонть чачомсто сон пандови целанек. 2025 иестэ кемекстазь сиведемань договортнэнь коряс квартиратнень максомань региононь од программа, седе тов рамамонь права марто, семиятнень туртов, кить чачтасть эйкакш ды важодить бюджетэнь енкссо. Текень пингстэ, бути сиведемань договоронть кемекстамодо мейле семиясонть чачить колмо эйкакшт, квартиранть мереви рамамс рынкань питнень эйстэ 0,1% коряс.
Мордовиянь Прявтось истя жо тешкстызе эрицятнень репродуктивной шумбрачист кемекстамонтень лездамонь корпоративной тевтнень эрявиксчинть. «Минек республикасо те иенть яволявтынек Шумбрачинь иекс. Весе районтнэсэ ютавтано покш диспансеризация медицинань специалисттнэнь марто. Башка мель явтано репродуктивной шумбрачинтень», - мерсь Артём Здунов.
Мордовиянь Прявтось ёвтась сюкпря Стратегической инициативатнень агентствантень вейсэнь важодеманть кисэ, конась аравтозь демографиянь коряс решениятнень вешнемантень. Госсоветэнь «Семья» ёнксонть коряс комиссиянь важодеманть лувсо ваннови сынст лезэвчист. «Весе регионтнэнень эряви виевгавтомс вадря практикатнень!» - тешкстызе Артём Здунов.
Чачоматнень кастомань кевкстеманть коряс эсь важодевксэст истя жо невтизь РАН-нь Народнохозяйственной прогнозированиянь институтонь прявтось Александр Широв, М. В. Ломоносов лемсэ МГУ-нь экономической факультетэнь народонаселениянь кафедрань прявтось Ирина Калабихина, Д.И. Менделеев лемсэ Демографиянь политикань институтонь исполнительной прявтось Иван Ефимов.
Мордовия Республикань Прявтонь Пресс-службась