Делегациянь участниктненень пшкадемстэ, республикань Прявтось Артём Здунов тешкстызе, Мордовиясь – раськетнень ды религиятнень ялгаксчинь невтевкс: тесэ эрить 90 раськетнень представительтне, тонавтнить студентт 54 мастортнэстэ, важодить Индиянь ды Китаень культурань куншкакурот. Регионсонть вадрясто виевгавтозь спортонь инфраструктурась, промышленностесь, АПК-сь, вадря образованиясь.
«Минь православной республика ды свалшкань питнейчитнень ванстыцят. Минь инжетнень вадрясто вастыця ды сэтьме регион, минек ламо мазый тарканок. Минек кенкштне свал панжадот тынк туртов. Сюкпря шканть кисэ, конань тынь явинк Мордовиянтень. Фестивалень лозунгось - «Начнем будущее вместе!», целанек кирдян сонзэ», – тешкстызе Артём Здунов.
Конго Демократической Республикань представителесь Налумбу Киландамоко Оси евтась сюкпря РФ-нь Президентэнтень ды Мордовиянь Прявтонтень Масторлангонь фестивальсэнть улемань возможностенть кисэ: «Тей пурнавсть ламо мастортнэнь ды культуратнень представительтне, весе кармасть содамо ламо од. Мон эзинь учо, тесэ минек вастсамизь истямо вечкема ды кеняркс марто, те ульнесь пек мельспаро».
Конгосто фестивалень участникесь важоди нармунтнень производстванть ды продукциянь переработканть коряс, арси виевгавтомс тевдеемань енкстнэнь АПК-сонть. Сась Россияв эсь содамочитнень келейгавтомо.
Артём Здунов алтась: ули анокстазь вастовома республикань велень хозяйствань ды продовольствиянь министранть марто.
Максим Танк лемсэ Белоруссиянь государственной педагогической университетэнь студенткась Владислава Столерова евтнесь общественной тевдеемань енкссонть вадря практикатнеде ды тешкстызе Россиянть ды Белоруссиянть ютксо вейсэнь тевдеемань эрявиксчинть.
Италиясто Иневанькс Седеень Католической университетэнь студентэсь Страмецци Пьетро тешкстызе, масторлангсонть ней ветяви кулянь алкуксонь война, тевс нолдазь пшти цензура.
«Кода мерсь Россиянь Президентэсь Владимир Путин: «Виесь видечисэнть». Мон арсян вандынь чиденть, конасонть масторлангось карми кирдеме вейсэнь тевдеемань сюлмот политиктневтеме, масторлангодонть, конасонть васенце таркасо кармить свалшкань питнейчитне, – мерсь Италиясто инжесь. – Кемеде, те западонь алкуксонь арсематне. Видечиденть евтнемась – алкуксонь журналисттнэнь важодемась. Сюкпря тынк Президентэнтень ды Мордовиянь Прявтонтень возможностенть кисэ улемс историянь те тевсэнть. Илядо стувтне минек ланга, минь тынк марто. Масторлангонтень – сэтьмечи!»
Артём Здунов евтась сюкпря од ломанентень кеме ванновтонть кисэ – аштемс сэтьмечинь ды видечинь ванстоманть кисэ: «Карматано важодеме вейсэ!»
Мордовиянь вузтнэнь важодемадост, раськеютконь вейсэнь тевдеемадонть ды омбо масторонь студенттнэнь туртов тонавтомань программатнеде евтнесть Н.П. Огарев лемсэ МГУ-нь ректорось Дмитрий Глушко, М.Е. Евсевьевень лемсэ МГПУ-нь ректорось Марина Антонова.
Ламот мастортнэнь представительтне кортасть ламот енкстнэнь коряс Россиянть марто вейсэнь тевдеемань бажамодонть, кортамось истя жо мольсь минек республикасо образованиянь получамодонть. Од ломантнень вейкеяк мелесь-арсемась эзь кадово Мордовиянь Прявтонть ванновтомо.
Мордовия Республикань Прявтонь Пресс-службась