Чадыковонь 25-це чистэ медицинань лезксэнь куроксто явомань службань важодицятненень профессиональной кенярксчинть ды юбилеень чинть кувалма поздоровт евтась Мордовиянь Прявтось Артём Здунов.
Тешкстазель, ней лезксэнь куроксто явомань службасонть важодить 900 седе ламо ломанть – те врачт, средней медицинской важодицят, машинань ветницят ды лия специалистт. Эрьва иестэ службась топавты 200 тежадо седе ламо тердемат.
«90 иетнень перть ламось полавтовсь – ломантне, важодемань лувтне. Ансяк сехте прявтось, медицинань лезксэнь куроксто явомань службась ульнесь ды кадови медицинань икеле молиця отрядокс. Сехте стака тевтнестэ, конатне лиснить ломанень эрямосо, минь васенцекс пшкадтяно врачтнэнень. Тынк авторитетэсь пек покш!» – мерсь региононь руководителесь.
Артём Здунов тешкстызе: апак вано важодемань весе стакачинть лангс, службасонть важодить лиятнень енов а молиця трудонь династият. Саранскоень Медицинань лезксэнь куроксто явомань службань станциясонть эйстэст зярыя - Ивановтне, Ремнёвтне, Афанасьевтне ды Аникинтнэ. Сынст важодемань вейсэнь стажось малав 500 иеть. Сехте редявикс невтевкстнэстэ вейкесь – Аникинтнэнь семиянь важодемань династиясь: колмо поколениятнестэ семиянь вете члентнэ уш важодсть 150 седе ламо иеть ды поладыть явомо лезкс ломантненень.
Медицинань лезксэнь куроксто явомань службанть важодемась стака ды веши ламо вийть. Тень кувалма Мордовиянь Прявтось тешкстызе: вадря образованиясь ды наставниктнень опытэнь максомась саи покш талика профессиясонть. Ламот апак учонь тевтне вешить врачонть ды фельдшерэнть пельде ламо содамочить. Секскак тесэ важодить ансяк алкуксонь профессионалт, конат кемевикст эсь тевентень. Пек эряви медиктнень юткс од кадратнень самось. Покш смусть ней явови васенце лезксэнь явомантень эрицятнень тонавтомась – республикась топавты варчамонь проект тактической медицинанть коряс.
Мельспаро, меельце иетнестэ редявикстэ одкстомтовсь медицинань лезксэнь куроксто явомань службань автопаркось – ансяк мелят сон пештевсь 21 автомобильсэ, 5 иетнень перть республикав пачтязь 150 седе ламо од машинат. Вельмевтевсь санитарной авиациянь важодемась.
«Евтан тенк сюкпря героической важодеманть кисэ, ламо вийтнень путоманть кисэ, цидярдоманть кисэ, психологической виевчинть кисэ, сехте стака шкатнестэ ломантненень лездамонть кисэ. Покш сюкпря тенк ды карксамос сюконямо!» – мерсь прядовомга Артём Здунов.
Мордовиянь Прявтось явшесь покш казнеть. Истя, ламо иетнень перть важодеманть ды медицинань лезксэнь куроксто явомантень покш путовксонть кисэ «За самоотверженный труд» отличиянь тешксэ казезь Медицинань лезксэнь куроксто явомань станциянь врачтнэ Людмила Автаева ды Адиля Федина, истя жо Ирина Ахлестина Рузаевкань центральной районной больницястонть. «Заслуженный врач Республики Мордовия» почетонь лемесь максозь Медицинань лезксэнь куроксто явомань станциянь старшей врачонтень Татьяна Михайлованень, «Заслуженный работник здравоохранения Республики Мордовия» – Комсомольской ЦРБ-нь медицинань лезксэнь куроксто явомань фельдшерэнтень Маргарита Полушкинанень.
Церемониянь участниктненень поздоровт истя жо евтасть вице-премьерэсь Галина Лотванова, Мордовиянь Госсобраниянь Председателень полавтыцясь Наталья Долматова ды МР-нь шумбрачинь ванстомань министрась Олег Маркин.
Мордовия Республикань Прявтонь пресс-службась