2026 иесь Мордовиясо яволявтозь Шумбрачинь иекс. Секскак региононь шумбрачинь ванстомань министерствань итогонь коллегиясь кармась прявт тевтнестэ вейкекс. Сонзэ важодемасонзо ульнесь Мордовиянь Прявтось Артём Здунов.
Шумбрачинь ванстомань енксось – эрицятнень туртов сехте талновтыцятнестэ вейкесь. Сонзэ важодемадонзо ды те иентень арсематнеде домкасто пачтясь министрась Олег Маркин. «Шумбрачинь ванстомань системань прявт тевесь - демографиянь тевтнень вадрялгавтомась ды эрицятнень шумбрачист ванстомась», - тешкстызе сон.
Икелепелень невтевкстнэнь коряс республикасонть 2025 иестэ эрямонь кувалмось кармась 76,06 иеть. Ледстясынек, 2030 иентень сон кармазо 78 иеть. Ютазь иестэ минек регионсо эйдень куломань невтевксэсь - ПФО-со ды целанек масторонь келес сехте вишкинетнестэ вейкесь.
Аватненень, цёратненень, семиятненень, кить арсить эйкакшто, первичной медико-санитарной лезксэнь доступностенть ды вадрячинть кастомась – прявт ёнкстнэстэ вейкесь. Республикасонть панжозь авань вете од консультацият, важодить медико-социальной лезксэнь кавто куншкакурот ды эрямонь стака шкас понгозь пешксесэ аватненень психологической ды медико-социальной лезксэнь кото нупальть.
Олег Маркин тешкстызе, республикасонть малав 25% аватнень арасть эйкакшост. Кармавтозь теемс неть аватнестэ эрьванть шумбрачинь анализэнть ды бути эряви явомс эрявикс медицинань лезкс.
Шумбрачинь ванстомань системанть лангс ютавкстнэ мелят кармасть 12,2 млрд седе ламо целковойть, тедеде шумбрачинь ванстомантень явовить малав 13,3 млрд целковойть. Мелят витнезь медицинань организациятнень 12 зданият ды рамазь оборудованиянь 400 седе ламо единицат, одкстомтови онкодиспансерэсь. Тедеде арсеви рамамс 31 ФАП ды врачонь кавто амбулаторият, педе пев витнемс Краснослободскоень ЦРБ-нь лабораториянь зданиянть.
«Республикань Прявтось 2026 иенть яволявтызе Шумбрачинь иекс. Те путы башка ответственность шумбрачинь ванстомань отраслянть лангс, - мерсь Олег Маркин. - Тедеде эрицятнень шумбра ды эряза эрямост кувалгавтоманть туртов минек икеле аштить покш тевть. Саемга, иень перть эряви пачкодемс сиянь иень эрьва эрицянть видьс, седеяк пек васоло велетнесэ».
Коллегиянть лувсо истя жо кортасть медицинань обязательной страхованиянь системань важодемань невтевкстнэде, авань ды эйкакшпорань службань национальной тевтнень топавтомадо, седеень-санонь орматнень каршо бороцямонь коряс проектэнь топавтомадо, региононь онкологиянь службань тевдеемадо, истя жо орматнень профилактикань эрявиксчиде.
Коллегиянтень итогтнень ёвтамсто, Артём Здунов явсь мель демографиянь тевтненень: эрямонь кувалгавтомантень, куломатнень киртямонтень, репродуктивной шумбрачинь кирдемантень, важодеме маштовиця эрицятнень ванстомантень. Те важодемасонть прявт инструментэкс кармаст профилактикась, редямось ды лецямось.
Тешкстазель, седе товгак карми касомо-кепетеме медицинань инфраструктурась. Шумбрачинь ванстомань сехте эрявикс сегментэсь - первичной медико-санитарной лезксэсь. Башка мель явови Перинатальной куншкакуронь одкстомтомантень. Икелепеле - Рузаевкань ЦРБ-нь лецямонь корпусонь ды Саранскоень Чачтомань кудонь одкстомтомань коряс федеральной куншкакуронть марто важодемась.
«Ютазь иень невтевкстнэнь коряс республикасонть профилактикань ванноматне токшесть малав 70% эрицятнень. Путтано бажамо - диспансеризациянть сядо процентэнь токшемась», - тешкстызе региононь Прявтось.
Башка кевкстемась - велетнесэ куломатнень киртямось, кудосо апак учо куломатнень киртямось. Тенесэ лездаст выездной бригадатне, истя жо эрьва пациентэнть коряс врачтнень пельде тевтнень содамось.
Прявт тевтнестэ вейкесь, конатнень путынзе республикань руководителесь, - обществасонть эрямонь шумбра лувонть, спортонть ды эсь шумбрачинть мельга ваноманть тевс нолдамось. Весе те карми юрокс шумбра кувака эрямонь топавтомантень.
Чадыковонь прядовомсто Саранскойсэ ютавтови «Россия и мир: тренды здорового долголетия» форумонть лувсо весероссиянь покш конференция, ды панжтано «Центр медицины здорового долголетия».Те федеральной виев проект, домка диагностикань ды профилактикань коряс инновациянь кластер, конантень Мордовиясь сови масторсонть васенцетнень ютксо.
«Сюкпря те иенть кисэ - тынь весе покш профессионалт ды молодецт. Важодемадонть ламо, ансяк кеман, вейсэ минь весементь топавтсынек», - пшкадсь шумбрачинь ванстомань енксонь специалисттнэнень Артём Здунов. Сон истя жо явшесь покш казнеть республикань врачтненень.
Мордовия Республикань Прявтонь Пресс-службась