Мордовиянь Прявтось Артём Здунов чадыковонь 9-це чистэ вастневсь РФ-со Казахстан Республикань Чрезвычайной ды Полномочной Посолонть Даурен Абаев марто. Кортавсь кавто ёндонь раськеютконь вейсэнь важодемань виевгавтомась.
Ледстясынек, Саранскойсэ те чистэнть панжовсь Казахстан Республикань Почетной консулонь офисэсь.
Казахстанонь делегациянтень пшкадемстэ, Артём Здунов тешкстызе республиканть туртов покш тевенть ды те структуранть эрявиксчинзэ, кода бизнесэнть, инвестициятнень ды ломанень сюлмотнень туртов важодиця инструментэнть.
«Покш почёт, Мордовиясо ней ули Казахстанонь эсензэ представитель – минек туртов те пек эрявикс. Казахстанось саи васенце тарка Мордовиясто усковиця продукциянть покшолманзо коряс. Минек туртов прявтокс ашти вейсэнь важодемась ды рынкатнень келейгавтомась. Минек предприятиятне совить Россиянь покш предприятиятнень рисьметнес. Секскак минек марто важодезь, мереви важодемс Россиянь ламо покш концернатнень марто», - мерсь региононь руководителесь.
Мордовиянь Прявтось истя жо тешкстызе вейсэнь тевдеемань виевгавтомасонть бизнес-миссиятнень прявт смустест. Казахстанось умок ды кеместэ сови республикань внешнеторговой прявт партнёртнэнь юткс. Перспективной ёнкстнэ - ярсамопелень производствась, велень хозяйствась, радиоэлектроникась ды ламо лия мезе.
Покш смусть канды гуманитарной енксось. «Минь братской раськеть, ламо пингетнень перть сюпалгавттано вейкенек-вейкенек культурань ёндо. Минек масторсо те иенть Президентэсь яволявтызе Россиянь раськетнень вейсэндявомань иекс, минь явтано тенень покш мель!» - тешкстызе Артём Здунов.
Даурен Абаев ёвтнесь, делегациянтень уш удалась ванномс ды максомс питне Мордовиянь промышленной потенциалонтень.
«Россиясо Казахстанонть вете генеральной консульстванзо ды 10 Почётной консулонзо. Минь бажатано важодемс Россиянь весе регионтнэнь марто, Саранскойсэ панжозь офисэнть вельде карматано явомо седеяк покш мель тынк республикантень», – тешкстызе Казахстанонь Посолось.
Башка тешкстазель, Казахстанось – регионсонть нолдавиця чугункань кинь таркасто таркас шаштневиця составонь прявт рамсицятнестэ вейкесь. Транспортонь-логистикань инфраструктурань виевгавтомань коряс покш проекттнэнь топавтоманть мельсэ кирдезь, те продукциянтень эрявиксчись касы.
Мордовия Республикань Прявтонь Пресс-службась