Цетвергстэ, якшамковонь 20-це чистэ, «Саранск-Арена» универсальной залось эсензэ эень аренасонть примась спортонь васенце покш пелькстамот. Панжомань церемониянтень сакшнось Мордовиянь Прявтось Артём Здунов.
"Сюкпря Россиянь Президентэнтень Владимир Владимирович Путиннэнь те покш проектсэнть миненек лездамонть кисэ! - мерсь республикань руководителесь. - Башка ярмактнень явомаст кисэ, конатнень лангс прядозь те объектэнть строямось, конанень 10 ламо иеть. Миненек кемсть, ды минь топавтынек алтамонть - максынек объектэнть ацамковонь поядовомсто, ды вана якшамковсто тесэ, кода арсевськак, ютавтови юниортнэнь ютксо фигурной кирякстнемань коряс Россиянь первенствась. Кеман, икеле - ламо покш мероприятият, конат ютавтовить те од аренасонть, конась лади раськеютконь стандарттнэнень. Мордовиясь кемексты региононь статусонть, косо фигурной кирякстнемань ды спортонь эень весе видтнэнь коряс покш пелькстамотне ютавтовить пек парсте".
Мордовия Республиканть пельде Россиянь Федерациянь сенаторось, Федерациянь Советэнь раськеютконь тевтнень коряс комитетэнь председателень васенце полавтыцясь Сергей Кисляк истя жо евтась поздоровт пурнавозетненень спортонь, од порань ды мазычинь кенярксчинть кувалма, конась юты эень од аренасонть. "Течинь пелькстамотне панжить те покш залонть историясо васенце лопа, конань уш течи кармить сермадомо ероков од спортсментнэ! Сы шкасто Саранскоесь карми покш спортонь алкуксонь прявтошокс!" - мерсь сон.
Артём Здунов тешкстызе, пелькстамотнень панжомантень сась Индия Республикасо РФ-нь Чрезвычайной ды Полномочной посолось Денис Алипов:"Ды те аволь стяко, эдь эень од аренась - раськеютконь уровнянь площадка".
Индиясо фигурной кирякстнемась ашти касомань-кепетемань ушодомань пелькссэнть, тень лангс апак вано, масторсонть 2003 иестэнть саезь ютавтови раськень чемпионатось, кавто иеде икеле Индиясто фигуристтнэ пелькстасть раськеютконь Гран-принь юниортнэнь сериянь вейке этапсонть. Тень кувалма Мордовиянь Прявтось мерсь, республикась анок явомс эсензэ компетенцият ды материально-технической юр омбо масторонь спортсменттнэнь анокстамост, истя жо раськеютконь спортонь мероприятиятнень ды сбортнэнь ютавтомаст туртов.
Индия Республикасо РФ-нь Чрезвычайной ды Полномочной посолось Денис Алипов пшкадсь пурнавозетненень шумбракстнемань вал марто ды тешкстызе, Россиясь - спортонь ине держава ды фигурной кирякстнемань коряс лидер. "Саранскойсэ мон васенцеде, ансяк сельмем сявады се мелентень, конась явови спортонь те видэнтень - строявить од стадионт, эень аренат, теевить весе возможностне од изнявкстнэнь саемаст туртов!"
Россиясо Конькасо фигурной кирякстнемань Федерациянь генеральной прявтось Александр Коган евтась сюкпря республикантень ды Мордовиянь Прявтонтень:"Сюкпря тенк кеме валонть кисэ, конась топавтозь - течи минь пурнавинек Эень те дворецэнтень! Сюкпря Саранскоень эрицятненень, конат сакшныть пелькстамотнес, сэредить спортсменттнэнь кисэ!" Тешкстазель, Саранскойсэ турнирэнтень башка смусть максы се, сонзэ итогтнень коряс пурнави юниортнэнь ютксо масторлангонь чемпионатс Россиянь сборноесь, пелькстамотне ютавтовить эйзюрковсто Болгариянь София ошсонть.
Саранскойсэ юниортнэнь ютксо конькасо фигурной кирякстнемань коряс Россиянь первенствась яволявтозь панжозекс. Ледстясынек, якшамковонь 20-це чистэнть саезь пелькстамотнень виде трансляциянть вети Васенце каналось.
Мордовия Республикань Прявтонь пресс-службась