Панжиковонь 9-це чистэ Мордовиянь Прявтось Артём Здунов сась Ине Отечественной войнань ветеранонтень, инвалидэнтень Иван Михайлович Кротовнень, евтась тензэ поздоровт Ине Изнямонь кенярксчинть кувалма.
17 иесэ Иван Михайлович доброволецэкс тусь Тиринь масторонь ванстомо, воевась Белорусской фронтсо. 1944 иестэ ранявомадо мейле понгсь комиссованияс. Казезь Ине Отечественной войнань орденсэ, «За освобождение Белоруссии» медальсэ.
Войнадо мейле Иван Михайлович важодсь Покш Игнатовань енксонь Кировонь лемсэ колхозсонть. Александра Николаевна нинзэ марто трясть-кассть колмо эйкакшт, Иван Михайловичень кото нуцьканзо ды вейксэ правнуцьканзо. Ней ветеранось эри церанзо марто Саранскойсэ. Сон кенярдсь республикань Прявтонть марто вастовомантень, евтась сюкпря Артём Алексеевичнень мелень явоманть кисэ.
Ветеранось тердизе республикань руководителенть столь экшс, косо, нама, кортасть кенярксчиденть, солдаттнэде ды тылэнь важодицятнеде, конатнень марто вейсэ малавгавтсть изнямонть. Артём Алексеевич мерсь: «Сюкпря тыненк ды тынк поколениянтень, конась макссь тенек эрямо ды ванстызе минек масторонть фашизманть эйстэ. Сюкпря Изнямонть кисэ! Пазось максозо тенк шумбрачи».
Мордовия Республикань Прявтонь пресс-службась