Мордовиянь Прявтось Артём Здунов даволковонь 12-це чистэ ульнесь Теньгушевань енксонь депутаттнэнь Советэнь сессиясонть.
Сессиянть ушодовомадо икеле региононь руководителесь теевсь содавиксэкс выставканть марто - тосо невтезель СВО-нь боецтнэнень лездамонь коряс важодемась, истя жо кедьчелькев ломантнень изнявксост. Сюпав теньгушевань модась виев ды ёроков ломаньсэ!
Райононть эрямосо прявт ёнкстнэстэ вейкесь - специальной военной операциянь участниктненень лездамось. Муниципальной штабонть юрсо ладязь важодема гуманитарной лезксэнь примамонть, кекшемань алтыматнень кодамонть, лембе оршамопельтнень ды вельтявкстнэнь стамонть, военнослужащейтнень туртов посылкатнень пурнамонть коряс. 2025 иестэ теньгушевань эрицятне кучсть СВО-нь таркас 92 рейст, малав 15 тоннат гуманитарной лезкс.
Важодемань цетавкстнэде прявт пачтямо марто пшкадсь муниципальной образованиянь прявтось Ольга Куткина.
«Миненек ули мезень коряс кирдемс каштанчи, минь топавтынек ламо проектт социальной учреждениятнень витнеманть ды строямонть, китнень витнеманть, сэдьтнень строямонть коряс. Меельце вете иетнень перть райононтень явозь малав 1,5 млрд.целковойть федеральной ды республикань ярмакт региононь смустень китнень витнеманть мельсэ кирдезь. Те покш ярмакт минек райононть туртов, истямо минек эште эзь ульне. Витнезь-петнезь кавто школат, путозь неень шкань оборудования. Те максы возможность минек эйкакштненень получамс вадря образования, истя жо дополнительной - истямо жо, кодамо ошонь эйкакштнень. Тедеде арсеви строямс ФАП Такушево поселкасонть ды врачонь амбулатория Барашево поселкасонть. Те лезды вадрялгавтомс минек эрицятненень медицинань лезксэнь явоманть», - тешкстызе сон.
Райононтень эряви важодемс семиянь оймсеманть туртов условиятнень тееманть коряс. «Минь сюпавт раськень культурань койтнесэ, пертьпельксэнь мазый таркатнесэ. Семиянь оймсемань анокстамонть туртов минек улить весе условиятне. Районсонть улить туристэнь тердемань объектт. Сынст пельксэсь уш ладязь семиятнень туртов. Мелят райононь туристэнь невтемань объекттнэс сакшность 880 туристт минек масторонь эрьва кодат регионтнэстэ», - тешкстызе Ольга Куткина.
Сехте сеедьстэ ванновиця таркатнестэ вейкесь - «Мардарика Шокша» сырань кудынесь, маласо шкастонть анокстави семиянь оймсеманть туртов од маршрут, ков сови «Теньгушевская семицветка» клубонь содавтомась.
Меельце вете иетнень перть ламо теезь райононь эрицятнень эрямост вадрялгавтомга. Национальной проекттнэнь ды государственной программатнень топавтоманть лувсо витнезь прявт площадесь, Культурань ды оймсемань паркось, Теньгушева велесэ лисьмапрясь ды оймсемань таркась, строязь Культурань кудонь зданиясь, вадрялгавтовсь площадесь ды теезь эйкакшонь ды спортонь площадка Барашево поселкасонть, педе-пев витнезь Теньгушевань культурань кудось, панжозь кавто модельной библиотекат, витнезь Культурань кудось Такушево велесэ, вадрялгавтозь паркось Дачный поселкасонть, теезь эйкакшонь налксемань ды спортонь вейксэ площадкат райононь велетнесэ, строязь 7 эрямо кудот райононь агропромышленной комплексэнь ды бюджетэнь учреждениятнень важодицятненень сиведемань договортнэнь коряс, 6 кудот уроз-эйкакштнень туртов, 6 ламо квартирань эрямо кудот ташто ды каладозь кудотнестэ эрицятнень ютавтомаст туртов Барашево поселкасонть, витнезь региононь 45 вайгельбень кувалмосо 15 кить, строязь сэдь Вечкилейка леенть трокс.
«Минек райононь весе эрицятнень пельде ёвтан тенк сюкпря, Артём Алексеевич, истямо виев лезксэнть кисэ», - мерсь Ольга Куткина.
Мордовиянь Прявтось тешкстызе, Теньгушевань енксось 2025 иестэ социально-экономической прявт невтевкстнэнь целевой смустест топавтомань икелепелень цетавкстнэнь коряс ашти котоце таркасо - те вадря невтевкс. Текень пингстэ райононть васенце тарказо консолидированной бюджетс налогонь ды аволь налогонь доходтнэнь пачтямонть коряс. Райононть арась просроченной кредиторской долкозо, истя жо МСП-нь субъекттнэнь икеле.
Региононь руководителесь кортась талновтыця кевкстематнеде, тешкстызе, весе сынь редязь ды кармить ванновомо. Сессиясонть ульнесть МР-нь Прявтонь ды МР-нь Правительствань Администрациянь представительтне, министерстватнень руководительтне. Башка ванновт ало - ЖКХ-нь ды китнень строямонь кевкстематне. Прявт стакачитнестэ вейкесь - коммунальной инфраструктурань таштомгадомась. Министратненень кармавтозь муемс ёвтазь кевкстематнень витемань ёнкстнэнь. Талновтыця таркатнень ютксо - Красный Яр велесэ ведень пачтямонь сеттнень полавтомась, Теньгушевасо Интернациональная ды Западная куротнева китнень теемась.
«Минек ули аравтлув, карматано сонзэ коряс важодеме, - мерсь Артём Здунов. – Теньгушевань енксось важоди вадрясто, минь тынк кувалма кирдтяно каштанчи».
Мордовия Республикань Прявтонь Пресс-службась