Те чистэнть вейке столь экшс пурнавсть мусульманской общинань старейшинатне ды активисттнэ, истя жо «Якташлар» Мордовия Республикань татартнэнь региононь раськень-культурань автономиянь, свалшкань конфессиятнень ды общественной организациятнень представительтне, предпринимательтне, шкинемав ломантне ды СВО-нь участниктнень семиятне. Омбоце ие Рамадан ковстонть постось ды Православной ине постось молить малав ве шкасто. Республикань ифтарсонть истя жо ульнесь Саранскоень ды Мордовиянь митрополитэсь Зиновий.
Пурнавозетненень пшкадемстэ, Артём Здунов евтась поздоровт весенень Россиянь Федерациянь Президентэкс Владимир Владимирович Путинэнь кочкамонзо кувалма – республикань мусульмантнэ, кода Мордовиянь весе эрицятне, теизь эсь путовксост те изнямонтень.
Сюкпрянь валт евтазельть мусульманской общественностень лемс республикасонть ютавтовиця весе мероприятиятнесэ ероков участиянть кисэ, сынст ютксо од ломаненьгак, ды СВО-нь участниктненень ды сынст семиятненень гуманитарной лезксэнь явоманть кисэ.
«Монь туртов покш честь: тынь тердимизь монь ды мартон важодицятнень. Тедеде Рамадан ковось ды православной постось молить ве шкасто – минь вейсэ бороцятано пелематнень каршо, топавтано а мерематнень, бажатано теемс седе вадрякс эсь прянть ды перьканок масторлангонть. Ули покш мелем: неть читнестэ минек вейсэндявольть ванькс арсематне, лездамс бажамотне – аволь покш уличи марто ломантненень, ламо эйкакшонь семиятненень ды сеттненень, кие емавтынзе малавиксэнзэ, истя жо СВО-со. Те минек вейсэнь тевесь, конась а явови раськетнень, пазнэнь кемемань коряс. Видечиденть вере – ансяк мелень явомась, конась теи минек седе малавиксэкс Пазонтень», – мерсь Мордовиянь Прявтось.
Мордовиянь Мусульмантнэнь духовной управлениянь председателесь Раиль-хазрат Асаинов евтась сюкпря Мордовиянь Прявтонтень ифтарсо улеманть кисэ, тешкстызе, те пек вадря невтевкс лия регионтнэнь туртов.
«Мордовиянь мусульмантнэ свал кирдить республикань руководствань ушодкстнэнь. Сюкпря весе имамтнэнень – те ломантне, конат ванстыть нравственностенть, мораленть ды а нолдыть экстремистэнь мельтнень-ванновтнень минек республикав. Кадык Мордовиясо свал карми сэтьме ды шабратнень ютксо ялгаксчинь кеме сюлмот», – тешкстызе сон.
«Ознан Аллахонтень: кемекставоль минек седейтнесэ мелень явома ды цидярдома вейке вейкенень, касовольть лелянь-ялаксонь сюлмотне. Тень лангсо миненек сави важодемс», – мерсь Рафаэль хазрат Манюров – Мордовия Республикасо Россиянь ЦДУМ-нь полномочной представителесь. Сон евтась сюкпря Артём Здуновнень Кочкуровань енксонь Татарский Умыс велесэнть культурань кудонь тееманть кисэ, сонзэ эрицятне учость 10 седе ламо иеть.
Шамиль хазрат Сабитов – МР-нь ЦДУМ-нь муфтиень тевтнень топавтыцясь евтнесь, республикань мусульмантнэ озныть Всевышней Аллахонтень курокшкань изнямодонть, сэтьмечиденть: «Миненек кода ламо раськень ды ламо конфессиянь эрицятненень эряви ванстомс минек духовно-нравственной питнейчитнень, седе пек се шкастонть, зярдо минек Чачома масторось вастови тандавкстнэнь марто».
Саранскоень ды Мордовиянь митрополитэсь Зиновий мерсь: «Сехте питней масторлангсонть сэтьмечись, сонзэ лангс ней каявить кежень вийтне, сынст изнясы ансяк парось. Пазось кармавты весень минек кирдемс иневаньксэнть, ваньксчинть, видечинть, вечкеманть, сэтьмечинть. Минек ламо раськень ине масторось свал ванстась религиянь сэтьмечинть ды ламо раськетнень ютксо чарькодеманть. Ды минь карматано сонзэ ванстомо, штобу пачтямс эйкакштненень-нуцькатненень вадря виев вейкине мастор».
Мордовия Республикань Прявтонь Пресс-службась