Чадыковонь 8-це чистэ Московсо Сергей Лавровонь прявтсо ютась Россиянь МИД-нть пингстэ РФ-нь субъекттнэнь прявттнэнь Советэнь 46-це промксось. Сонзэ участникекс кармасть федеральной ведомстватнень руководительтне ды представительтне, зярыя регионтнэнь лидертнэ, сынст ютксо Мордовиянь Прявтось Артём Здунов. Мероприятиянь прявт кевкстемась – масторонь субъекттнэнь Африкасто партнертнэнь марто вейсэнь тевдеемань кемекстамось.
«Минек африканецтнэнь марто вейсэндить умонь ды кеме сюлмот. Течи континентэнь мастортнэ бажить изнямс колониальной зависимостень кадовкстнэнь, кемекстамс национальной суверенитетэнть, васняяк экономикань ды финансонь ёнкстнэсэ, - тешкстызе Россиянь Омбо масторонь тевтнень министрась Сергей Лавров. - Промышленной кооперациянь коряс тевтнень лувсо покш тарка саевельть бу Россиянь регионтнэ. Ули уш а берянь ушодкс: африкань мастортнэнь марто вейсэнь тевдееманть кирди Федерациянь 81 субъект».
Африкань рынкатнес отечественной товартнэнь, услугатнень ды технологиятнень шаштоманть туртов тешкстазель конгрессэнь-выставкань мероприятиятнесэ Федерациянь субъекттнэнь деловой миссиятнень эрявиксчись, Африкань опорной мастортнэсэ товаронь-логистикань хабтнень теемась, Египет Арабской Республикасонть Россиянь промышленной зонань теемась.
«Россиянь МИД-сь, Африкань мастортнэсэ дипломатической ды консульской представительстватне поладыть весемеёндо лездамо Федерациянь субъекттнэнень практической вейсэнь важодемань проекттнэнь шаштомасо, тень туртов эрявикс договоронь-правань юронь теемасо ды кемекстамосо. Минь куроксто вельмевтяно эсенек улеманок Африкань континентсэнть», - мерсь МИД-нь прявтось.
Внешнеполитической ковкерькссэнть прявт тевтнестэ вейкесь - Россия-Африка колмоце саммитэсь, конась юты Московсо те иень ожоковонь меельце читнестэ. Промксонтень пурнавозетне кортасть масторонь субъекттнэнь мельтнеде-арсематнеде, конат совавтовольть 2027-2029 иетнес Россия-Африка тевдеемань аравтлувонтень.
«Эштё весть тешкстаса башка смустенть, конань минь макстано россиянь-африкань отношениятнень регионъютконь онкстамонтень. Те кеме юр, конась кемекстамонть пингстэ лезды общегосударственной уровнясонть виевгавтомс сюлмотнень минек партнертнэнь марто», - мерсь Сергей Лавров.
Промксонть лувсо Мордовиянь Прявтось Артём Здунов пачтясь Африкань мастортнэнь марто сюлмотнеде. Мордовиянть улить раськеютконь сюлмавксонзо овсе эрьва кодамо енкссо: биотехнологиясто ды АПК-сто саезь вузтнэнь ютксо полавтоманть ды рузонь келенть шаштоманть видьс. Вейсэнь важодемась ладязь чугункань кинь промышленностесэ, пачтявить стройматериалтнэ ды ярсамопелень промышленностень продукциясь. Ансяк мелят Мордовиянь внешнеторговой оборотось Африкань мастортнэнь марто кармась 0,87 млн США-нь долларт.
Сень ловозь: Африкань мастортнэнь ламот эрицятне – те 20 иеде седе од ломанть, пек покш смусть саи образованиянь ды профессиональной кадратнень анокстамонь коряс вейсэнь важодемась.
Ней республикань вузтнэсэ тонавтнить студентт африкань 29 мастортнэстэ. Пек эрявить медицинань специальносттне ды IT-ёнкстнэ. Абитуриенттнэ ламолгадыть: ансяк меельце иестэнть сынь ламолгадсть малав кавксть.
Кемекставить культурань ды од ломанень сюлмотне вейсэнь проекттнэнь ды полавтоматнень вельде. Омбо масторонь студенттнэнь ды Африкань мастортнэстэ сыця инжетнень марто вейсэнь важодемась ветяви Ялгаксчинь раськеютконь клубонть лувсо Республикань од ломанень кудонть юрсо – свалшкане ютавтовить келень клубт, Мордовиянь прявт таркатнева экскурсият, истя жо Россиянь ды африкань мастортнэнь культураст коряс тематической вастовомат.
Туризмань ёнксось истя жо а кадови ве ёно – тедеде нолдазь «Саранск – Шарм-эль-Шейх – Саранск» раськеютконь рейсэсь.
Мордовия Республикань Прявтонь Пресс-службась