Компаниясь уш 13 иеть важоди республикасонть, 2018 иестэнть саезь лади важодеманть региононь операторонь лувсо отходтнэнь пурнамонь, ускомань, обработкань ды утилизациянь коряс весе Мордовиянь келес малав 650 эрямонь пункттнэсэ. Те шканть перть компаниясь путсь инвестицият аволь ансяк коммунальной техникантень, контейнерэнь парконтень, истя жо производствань вийтнес, сотрудниктнень туртов важодемань вадря условиятнень теемантень. Теезь абонентэнь неень шкань куншкакуро, ремонтно-технической юр, техниканть туртов эсест заправкань станция ды логистикань куншкакуро. Ансяк меельце кавто иетнень перть инвестициятне кармасть малав 200 млн целковойть.
Артём Здуновнень невтизь техниканть, конась пурны ды ускси отходтнэнь. Тедеде компаниясь рамась КАМАЗонь двуосной шассинть лангсо колмо вишка мусоровозт. Сынь кармить важодеме ошсо – теине китнень лангсо эрямонь таркатнестэ ды мусоропровод марто МКД-тнестэ ТКО-нь усксеманть туртов. Истямо мель-арсема евтасть ТСЖ-нь ды управляющей компаниятнень представительтне Мордовиянь Прявтонть марто вастовомасонть, конась ютавтовсь даволковсто. Компаниясь куроксто сынст топавтынзе.
«Ремондис Саранск» ООО-нь генеральной прявтось Светлана Бигессе евтнесь, республикасонть эрьва ие арсеви одкстомтомс мусоровозтнэнь парконть. Те иенть прядовомс рамавить эште колмо вишка мусоровозт (те 29 млн целковойть), сы иестэ – эште вете истят коммунальной машинат. Истя жо тедеде техникань заправканть туртов производственной площадкасонть теезь эсест автозаправкань станция, покшолмазо 40 тежат литрат дизелень уштомапель. Мордовиянь Прявтось истя жо ваннызе мусоровозтнэнь сервисной обслуживаниянь ды витнемань коряс ремонтно-технической юронть.
Республикань руководителентень истя жо невтизь административной нупальтнень ды эрицятнень марто важодемань коряс Региононь операторонь абонентэнь куншкакуронть – эрьва чистэ тей пшкадить Саранскоень ды Лямбирень енксонь кементь эрицят ТКО-нть марто обращениянь кисэ пандоматнень, перерасчетнэнь ловомань, справкатнень ды дубликаттнэнь получамонь коряс. Целанек весе республиканть келес важоди абонентэнь куншкакуронь 21 подразделения.
Компаниянь логистикань куншкакуросонть моли маршрутонь графиктнень кемекстамось. Эрьва чистэ отходтнэ усковить 10 тежадо седе ламо контейнерэнь площадкатнестэ, конатнесэ путозь 17 тежадо седе ламо контейнерт. «Ремондис» – региононь ЖКХ-нь енкссонть покш предприятиятнестэ вейкесь (тесэ важодить 475 ломанть), секскак покш мель явови важодемань вадря условиятнень теемантень. Артём Здунов макссь покш питне эрицятнень обслуживаниянь ладямонтень, важодицятнень кисэ мелявтомантень.
Мордовиянь Прявтось истя жо ютавтсь важодемань вастовома «REMONDIS International» раськеютконь концернань руководстванть марто, кортасть 2022-2023 иетнестэ важодемань невтевкстнэде, истя жо предприятиянь седе тов виевгавтомань арсематнеде. Ледстясынек, 2022 иестэ республикасонть панжозь ТКО-нь явшемань ды обработкань линия, виензэ 20000 тоннат иезэнзэ, ды касомань отходтнэнь компостированиянь линия – инвестициятнень покшолмась кармась 75 млн целковойть. Мелят 15 млн целковойть путозь шукшонь перегрузочной станциянь ды ТКО-нь логистикань коряс неень шкань предприятиянь строямс Краснослободской енкссо.
Вастовоманть прядовомга Артём Здунов тешкстызе компаниянь пельде покш мелень явоманть шукшонь башка-башка пурнамонтень ды экологиянь повестканть лувсо важодемантень, истя жо од ломантнень ютксо. «Вадря, компаниянть улить арсеманзо машинань ды контейнерэнь парктнень одкстомтоманть коряс. Карматано ладямо эскелькст шукшонь переработкань од комплексэнь строямонть коряс – те топавтсы отходтнэнь пурнамонь ды переработкань коряс весе системань кемевикс важодеманть», – мерсь региононь руководителесь.
Вастовомасонть ульнесть МР-нь Правительствань Председателень Полавтыцясь Инсаф Хайруллин ды Мордовиянь энергетикань ды ЖКХ-нь министрась Александр Голянин.
Мордовия Республикань Прявтонь Пресс-службась