Артём Здунов тешкстызе, Мордовия Республикань Промышленниктнень ды предпринимательтнень союзонь региононь вейсэндявксонь важодемань 15 иетне – те цела эпоха, конань шкасто лиссть пек ламо полавтомат бизнесэнть ды государстванть ютксо ладязь сюлмотнесэ. Неень шкане те тевдеемась седеяк пек эряви.
«Миненек ламо тееви вейсэ, – тешкстызе республикань Прявтось. – Мон свал панжадоян бизнесэнть туртов ды анокан аволь формальной лувсо кортамс-ванномс весе мельтнень-арсематнень».
Республикань руководителесь евтась сюкпря предпринимательствань представительтненень социальной ламо проекттнэнь кирдеманть кисэ. «Сюкпря, тынь арсетядо аволь ансяк эсенк бизнесэнть виевгавтомадо, истя жо сеть ломантнеде, конатне важодить тынк кедьсэ», – мерсь Артём Здунов.
Мордовиянь Промышленниктнень ды предпринимательтнень союзонь региононь вейсэндявксонь председателесь Виктор Бирюков тешкстызе, коронавирусонь инфекциянть каршо бороцямонь шкастонть предпринимательтнень вейсэндявксось ды властень органтнэ невтизь вейсэнь тандавксонть икеле вейсэндявоманть.
«Бизнесэсь куроксто редясь лецямонь учреждениятнень вешемаст, лездась стака шкатнестэ. Весемезэ явозель лезкс 20 млн целковойтнень питнесэ», – мерсь сон.
Виктор Бирюков истя жо тешкстынзе республикань предпринимательтнень туртов вадря тевтнень, конат лиссть меельце шкастонть. Истя, бизнес-вейсэндявксось эрязасто невтезь министерстватнень пингстэ общественной советтнэнь важодемасост, ульнесь Мордовиянь виевгавтомань стратегиянь анокстамосонть, ды целанекс инвестиционной климатось регионсонть вадрялгадсь.
Тешкстазель, предпринимательтне кирдить эйкакшонь оймсемань виевгавтомань программанть, конань ней аноксты республикань Правительствась. «Эйкакштнень шумбрачинь витемань лагерьтне важодест иень перть, минь аноктано лездамс тенень», – мерсь Виктор Бирюков.
Мордовия Республикань Промышленниктнень ды предпринимательтнень вейсэндявксонь вейсэнь промкссонть истя жо кортасть бизнесэнть ды региононь спортонь федерациятнень ютксо вейсэнь тевдеемань кевкстематнеде.
Мордовия Республикань Прявтонь пресс-службась