Мордовиянь Прявтось Артём Здунов сундерьковонь 24-це чистэ ютавтсь важодемань вастовома Россиянь Спортивной бороцямонь федерациянь президентэнть Михаил Мамиашвили марто. Кортавсть регионсонть спортонь те видэнь виевгавтомань кевкстематне.
Мордовиясо важоди А.В. Мишинэнь лемсэ спортивной бороцямонь ды дзюдонь олимпийской резервань спортивной школась, косо ветяви анокстамо спортивной бороцямонь, каркс лангсо бороцямонь, дзюдонь, самбонь, киокусинкаень, каратэнь, кедьсэ бороцямонь, тхэквондонь коряс. Школантень якить 1100 ломанть, 425-тнень улить спортивной разрядост ды званияст, 16 спортсментнэ - Россиянь Федерациянь сборной командатнес кандидатт. Эрьва иестэ Мордовиянь бороцицятне изнить раськеютконь пелькстамотнесэ.
Михаил Мамиашвили тешкстызе олимпийской резервань школань покш профессионализманть, яволявтсь, Федерациясь карми лездамо республикань ушрдкстнэнень, конат токшить спортонь те видэнь виевгавтоманть. Кортамось истя жо мольсь Мордовиясо Спортонь бороцямонь региононь куншкакуронть теемадо ды «Спортивная борьба в школу» проектэнть республикань общеобразовательной учреждениятнесэ топавтомадо.
Важодемань вастовомасонть ульнесть республикань Правительствань члентнэ, А.В. Мишинэнь лемсэ спортивной бороцямонь ды дзюдонь олимпийской резервань спортивной школань руководствась.
Мордовия Республикань Прявтонь пресс-службась