Субутасто, апрелень 8-це чистэ, Мордовиянь Прявтось Владимир Волков вастневсь «Норов» агрофирмань прявтонть Александр Поздняковонь марто.
Толковавсть 2016 иестэнть холдингень важодемань итогтне ды Кочкуровань районсо велень хозяйствань производствань виевгавтомань коряс икелепелень аравтлувтне.
Александр Поздняков пачтясь Республикань Прявтонтень 2016 иестэ важодемань итогтнеде, тешкстызе, миезь 5300 тоннат сывель, мезесь манынь коряс 1250 тоннадо седе ламо. Агрохолдингень хозяйстватнесэ 30 % ламолгадсь сюрось, лиссь 30 тёжат тоннадо ламо. Маласо иетнестэ арсеви весе вийсэ кармавтомс важодеме видьмексэнь заводонть (иезэнзэ 9000 тоннат видьмекст), те топавтсы республиканть вешеманзо вадря видьметнень коряс. Тень туртов строявить утомт, косо кармить ванстовомо 8 тёжат тоннат видьмекст, тедеде арсеви анокстамс малав 3 тёжат тоннат видьмекст.
Владимир Волков бажась содамс, кода моли Воеводской Станция поселкасонть неень шкантень ладиця заводонть строямось, конасонть чизэнзэ карми нолдавомо переработкас 10 тёжат литрат ловсо. Проектэнть вейсэнь питнезэ 150 миллионт целковойть. Тесэ кармить нолдамо ловсо, чапамо ловсонь продукция, топо, скалой, велькс, сырань зярыя видт, истя жо прявт ёнксокс карми мороженоень нолдамось. «Норов» агрофирмань прявтось кемевтизе республикань Прявтонть, келя, тедедень сёксня заводось карми анок.
Мордовия Республикань Прявтонть пресс-службась