«Кенярдан шумбракстнемс тынк команданть марто минек инжень вечкиця республикасонть, – мерсь региононь руководителесь. – Вейсэнь важодемась минек ушодовсь ютазь иень умарьковсто. Сундерьковсто минь ютавтынек фестивалень региононь пельксэнть, ванынек «Сёстры» спектаклянть, музыкань выступлениятнень. Течи минь ютавтано региононь эште вейке пелькс. Тедеде минек анокстазь седе келей программа: фестивалень ютавтомань читнень коряс, смустень коряс. Те киноважодемат, концертэнь программат, кинолаборатория. Студенттнэнь ули возможностест важодемс специалисттнэнь марто, тонавтнемс. Энялдан евтамс мельтнень-арсематнень ды важодемань икелепелень цетавкстнэнь».
Саранскоень ды Мордовиянь митрополитэсь Зиновий лемдизе фестиваленть пек эрявикс мероприятиякс. «Мон целанек кирдян республикасонть киноискусствань виевгавтоманть, – мерсь сон. – Фестивалень командась – те алкуксонь геройть, те се элитась, конадонть корты минек Президентэсь».
Проектэнтень совавтозь музыкантт, поэтт, артыцят, режиссерт – культурань ды искусствань деятельть, СВО-нь участникть, конат весе оймесэст сэредить эсь масторонть кисэ.
Кинолабораториянть важодемадонзо евтнесь Мордовиянь Прявтонь старшей советникесь Татьяна Алиходжина. Кемень читнень перть од кинематографисттнэ тонавтнесть документальной ды налксемань кинонь теемань теориянть ды практиканть. Тонавтоманть ютавтсть весе Россиясто специалисттнэ. Кинолабораториянь важодемань цетавксокс кармасть ниле снимазь фильматне.
«Кино на службе Отечеству» Раськеютконь таркасто таркас шаштневиця фестивалень прявтось Олеся Шигина евтась сюкпря республикань Прявтонтень проектэнь кирдеманть кисэ. «Минек туртов те васенце киношкола, те покш опыт. Мордовиянть покш шкинемань потенциалозо. Од ломантнень ули прявт енксост – оймень ваньксчист, алкуксонь искусстванть туртов те пек эряви, – тешкстызе сон. – Ули меленек: кинолабораториянть улезэ поладомазо, минь теевельнек Мордовиясо федеральной уровнянь проект. Минек воинтнэнь ине тевест ашти киноискусствань вельмевтемань юрсо. Чачома масторонтень эсь вийтнень апак вансто служамось карми рузонь культурасо од валонь чачома юрокс, конась соракавтсы масторлангонть».
Олеся Шигина – Отечествань ванстыцянь авась, церанзо-доброволецэнть мельга тусь Донбассов, штобу евтнемс спецоперациянь участниктнень ине тевдест ды а пелемадост, ды вейсэндинзе перьканзо ве мельсэ арсицятнень шкинемав покш команданть. Тов сови икелень эйкакшонь омбудсменэсь, сермадеесь ды телеведущеесь Павел Астахов, сонзэ церазо истя жо фронтсо. Павел Астахов - «Врач от Бога» - святитель Лука Крымскоень коряс документальной фильмань автор. Павел Астаховонь седе тов арсематнесэ – снимамс фильма приграничной территориятнесэ иневанькс таркатнеде, конатнень яжизь нацисттнэ. Те алкуксчинть содаст ломантне, васняяк – од ломантне. «Минек марто воеви материализованной кежесь. Штобу а максомс сонензэ изнямс, миненек эряви тонавтомс-превс путомс эйкакштнень. Эряви панжомс киношколат, ютавтомс фестивальть, тердемс од ломанть, меремс тенст кортамс минек боецтнэнь марто. Истя теевсь советской патриотической ине культурась – ине поэзиясь ды ине кинематографось. Мекс минь вантано советской фильмат? Секс мекс сынст снимасть сеть, кие ульнесь тосо, кие невтсь видечинть. Се, мезенть снимизь Голливудсо, те овсе лия. Секскак максозо Пазось, штобу фестивалесь эрязо!» – мерсь сон.
Россиянь Федерациянь Общественной палатань суверенитетэнь, патриотической проекттнэнь ды ветерантнэнь кирдемань коряс комиссиянь председателесь, Россиянь Федерациянь од субъекттнэнь интеграциянь коряс координационной советэнь сопредседателесь Владимир Рогов тешкстызе: «Мордовиясь – вадря тарка рузонь ломанень шкинемань потенциалонь панжоманть туртов. Тесэ марят эсь прят теке кудосо. Сюкпря, Артём Алексеевич, кирдеманть кисэ».
Мордовия Республикань Прявтонь Пресс-службась