Республикань руководителесь евтась сюкпря пурнавозетненень лезэв важодеманть кисэ, региононь социально-экономической виевгавтомантень путовксонть кисэ, истя жо минек боецтнэнень лездамонть кисэ, конат ней СВО-со.
«Ромодановосахарось» – райононть туртов прявт предприятия, заводсонть ули ероков ломантнень вейсэндявкс, конат свалшкань лувсо пурныть гуманитарной лезкс эсь земляктнень туртов. Покш лезкс яви предприятиянь руководителесь Александр Атласов. «Весе республикась важоди тень коряс, сюкпря лезксэнть кисэ», – мерсь Артём Здунов.
Течи «Ромодановосахарось» – Равчиресэ те отраслясонть сехте виев предприятиятнестэ вейкесь, сови Россиясо кемень сехте покштнень юткс. 2023 иестэ тесэ тейсть малав 144 тежат тоннат сахор – те 146% 2022 иенть коряс. Натой санкциятнень лувсояк заводось касты экспортонь тевдееманть. Топавтовить инвестициянь зярыя од проектт, сынст коряс евтнесь предприятиянь прявтось Александр Атласов. 2023 иенть перть прявт капиталс инвестициятнень покшолмась кармась 612 млн. целковойть.
2022 иень якшамковсто саезь «Ромодановосахаронть» юрсо панжозь республикасонть васенце участка, конась важоди кода исправительной куншкакуро. Чумондозетнень туртов строязь общежития, ней тесэ эрить 47 ломанть. Весемезэ «Ромодановосахарсо» важодить малав 800 ломанть. Среднемесячной зарплатась 2023 иестэ кармась 53 тежат целковойтнеде седе ламо, касомась кармась 115%. Предприятиясь лезды важодицятненень эрямо таркань рамамонь кевкстематнесэ, тесэ ули заводонь ипотека. Предприятиянь руководителесь евтась покш сюкпря республикань Прявтонтень весе ушодкстнэсэ лездамонть кисэ.
Артём Здунов тешкстызе, заводсонть теезь вадря юр, штобу поладомс сеть тевтнень вадрясто топавтоманть, конатнень путынзе Россиянь Президентэсь Владимир Путин национальной проекттнэнь ды масторонь продовольствиянь безопасностень топавтомань стратегиянть лувсо. Региононь правительствась, кода кемевтсь республикань руководителесь, полады явомо предприятиянтень эрявикс лезкс.
Вастовоманть прядовомга Артём Здунов явшесь Мордовия Республикань Прявтонь Благодарственной сермат предприятиянь важодицятненень цератнень – Отечествань ванстыцятнень - вадрясто кастоманть-тонавтоманть кисэ ды СВО-нь участниктненень гуманитарной лезксэнь явомантень путовксонть кисэ.
Мордовия Республикань Прявтонь пресс-службась