Рузонь православной церьковань Тонавтнемань комитетэнь представительтне састь республикав Саранскоень духовной семинариянь аравтлувонь коряс инспекциянь ванноманть туртов. Истят ванноматне ютавтовить тонавтнемань заведениятнесэ эрьва колмо иеть.
РПЦ-нь Тонавтнемань комитетэнь председателесь евтась сюкпря Мордовиянь Прявтонтень церьковань-государствань вейсэнь тевдеемань покш уровнянть ды регионсонть духовной образованиянь виевгавтоманть кисэ.
Ледстясынек, семинариясь теезь 2017 иестэ Иневанькс Синодонь решениянть вельде Московонь ды весе Русень Иневанькс Патриархонть Кириллэнь баславамонзо коряс. Тедеде сонензэ максозь государственной регистрация. Семинариясонть топавтовить тонавтомань ниле прявт программат, истя жо священнослужительтнень, монашествань кирдицятнень ды церьковань специалисттнэнь туртов квалификацияст кепетемань курсат.
Саранскоень духовной семинариясь - Научно-образовательной теологической ассоциациянтень, истя жо Равчирень федеральной округонь православной од ломантнень марто важодемань коряс Регионъютконь координационной куншкакуронтень совиця. Семинариянть юрсо ютавтовить олимпиадат школасо тонавтницятнень туртов, свалшкань вастовомат православной од ломантнень марто, экскурсият тонавтницятнень туртов.
Республикань руководителесь тешкстызе обществасонть духовно-нравственного образованиянь виевгавтомань, патриотизмань ды свалшкань питнейчитнень лувсо од ломантнень тонавтомань-превс путомань эрявиксчинть.
Мордовиясо гражданской институттнэ ды православной церьковась вейсэ важодить свалшкань лувсо. Мордовиянь митрополиясь тешкстась вейсэнь тевдеемадо Вейсладямот Образованиянь министерстванть, Культурань министерстванть ды Од ломантнень тевест коряс Госкомитеттэнть марто. Священнослужительтне примить участия «Разговоры о важном» уроктнесэ, конатне ютавтовить школатнесэ. Кода мерсь образованиянь министрась Елена Солдатова, тонавтыцятне тешкстыть истят уроктненень эйкакштнень мелест явоманть.
Вастовомасонть ваннозь регионсонть духовной образованиянь седе тов весемеендонь виевгавтомань кевкстематне. Рузонь православной церьковань Тонавтнемань комитетэнь Председателесь тешкстызе те енкссонть вейсэнь тевдеемань анокчинть.
Мордовия Республикань Прявтонь пресс-службась